【曾智華專欄】觀音開庫全港繽紛

近日與大群年老心不老的「多口佬」飯局。
　　
「隊」多兩杯之後，個個興致勃勃獻計點樣搞返旺香港，唔使成日人人只講執笠，謝吓謝吓。
　　
肥A：「我認為要吸引遊客，尤其內地客，先要突出佢哋冇嘅嘢，大搞特搞！例如內地唔准賭錢，香港就來個遍地開花，搞馬場導賞團，人人有機會參觀馬房，與馬王及名騎師打卡。馬會再派每人一百元投注券『荼毒』佢哋，加送紀念帽等等小恩小惠。另外，到六合彩累積千萬元獎金時，就組織萬人排隊團，嘗試排隊望發達滋味。當然更要參觀快活谷啤酒園，感受馬場之內狂歌熱舞盛況，之後咁鬼夜，當然要住多一日啦。」
　　
矮B：「內地不准迷信，咁香港就一於搞『大迷信團』，來個香港打小人節。先開班訓練三五千『打手』，D-day就全港十八區一齊打，區區有得打，除大官外，個個都可以打，並區區酒樓設計『打小人宴』，菜單與主題呼應，參加者可以全面發洩。總之要打得過癮，打得好玩，打得痛快。」
　　
奀C：「講起迷信，香港人最無厘頭有樣活動叫『觀音借庫』，我就觀察過幾次，好好笑。初初以為只有窮鬼才需借庫，原來錯！通宵排隊時，有N架名車載住闊太及肥佬老細到來排隊（搵人代排冇誠意，冇庫借）。其實參觀吓乜人排隊，已是一個旅遊景點。不過，當然一如矮B講，要做大佢，就要搞『全港觀音借庫日』，十八區關愛隊落水，由區議會製作大量觀音像四圍擺放，總之令你當日一出街就見觀音，就想起借庫，就可能會湊興去排隊。一旦成行成市，必成國際旅遊新聞，吸客潛質，絕不限內地，因『貪』乃四海皆準人性也。」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。