【曾智華專欄】興奮到震迎打吡

一年一度純本地賽最高獎金賽事明天舉行，十四匹四歲馬一生一次爭香港打吡（外地參加的不計），競逐總獎金二千六百萬元，頭馬獨得一千四百八十多萬元，今鋪套用沈集成口頭禪，肯定匹匹都會露出真面目，騎師則勢必「奶力都出埋」。
　　
跑這類大賽，騎師的心理質素極重要，因不能跑錯十分一秒，要非常鎮靜精準從事。這點新仔騎師肯定蝕底，因跑國際頂級大賽，要與殿堂級人馬較量，定有點怯。
　　
故此，呢場有幾個騎師，我不會考慮，包括班德禮、周俊樂、賀銘年、艾道拿、艾兆禮及希威森，加上論騎功仍未達頂級的田泰安，先飛起。
　　
另外，翻睇巡邏影片，發覺上場「禪勝輝煌」打到飛起，用得好盡，評磅員也具慧眼，雖輸畀「驕陽明駒」短馬頭咁勁，也只加五分，而後者根本未去盡，睇住食也。故此，明日雖有英國頂級高手布宜學執韁，我認為仍未夠班入Q，飛埋。
　
打吡戰最令人疑惑為「大至尊」，上次跑三班二千米，三個幾馬位拋離按韁贏，不知還有幾多在手，可能深不可測，但也可能會有二次出賽併發症，不宜作膽。蔡神仙出三隻，專誠請莫雅這位世界一哥來跑「安騁」，當然獨具慧眼。上場千八米莫雅只是「試跑」，隨隨便便入第三就收工，隻馬肯定未推到高峰。省完一場，應該到位了。最強對手仍是「驕陽明駒」，上次直路被困，一望空，布文已胸有成竹，睇住「禪勝輝煌」食。不過，賽後腳部有少少問題缺課兩天，是為隱憂。
　　
總結，呢場我將以「安騁」做二重彩複式膽，拖「驕陽名駒」、「大至尊」、「喜蓮勇感」及「錶之銀河」，細細注八十蚊，但入直路則會聲大大嗌。