【曾智華專欄】朝令錯，夕速改

全世界政府都要制定政策，官員不過是人，當然會有錯，也有思慮不周的時候。

目前政府運作難知，但以前的，制訂任何政策，必會在內部大辯論，再諮詢業界，然後AO互鋤，肯定冇乜得衰才推出。若再衰，負責官員就下台或調職可也，以免禍及「大老細」孭上身。
　　
不過，若遇著個專橫老細，也會霸王硬上弓，一意孤行，由上而下。如此，死火就大件事，當要由下屬或下任執「蘇州屎」。
　　
遠的不講，近二十年的，最佳例子是「孫九招」，唔賣地、停建公屋斬斷供應，咁點？你睇到，我睇到，即時香港樓市供求失衡，遇上零息加經濟大好，再加外地人到港炒樓，於是樓價火箭式上升。終於，後悔時已經太遲，因一塊地由生變熟，拍賣後起樓，冇七、八年唔成事，點搞？唯有用辣招稅夾硬撳，將全香港樓市扭曲，搞到經濟亂晒大龍。
　　
另兩例子，「明日大嶼」及垃圾收費，擺明冇充分經內部及業界甚至全港辯論，所有出事位未研究清楚就去馬。死得！上屆政府定下的，今屆立即領嘢，點收科？小弟睇，個垃圾徵費計劃就算拖到8月，仍必一鑊泡，希望我唔中啦。
　　
上屆政府留下的另一堆「蘇州屎」，也實在離譜。由上而下一錘定音（我的內線指出，曾多次「死諫」前特首咪搞），意圖用此博取民意，將兩蚊雞坐車降到六十歲。
　　
派錢容乜易？但應唔應該咁派法？另外，個黑洞有幾深，你考慮過嗎？
　　
終於，上任期滿，拍拍屁股去，本屆就接波，兩蚊雞搭車2023至2024年度已升到四十二億元，下年度預算更火箭式上到六十三億元，深不見底，年輕納稅人孭死，非常不公平。
　　
呢個「朝令」擺明錯，必須立即「夕改」喇！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。