【曾智華專欄】XX應否合法化

今日標題的「XX」，真係填乜都得㗎！
　　
十多年前小弟在香港電台電視部任編導，專負責青少年節目，其中之一為中學生辯論比賽。當時社會氣候唔興談政治，亦冇乜空間，故此，鎖定的辯論題目，來來去去都是「XX應否合法化」，「XX」可以是賭博、墮胎、娼妓⋯⋯
　　
條條題都好似有得辯論，其實當時我內心已覺多鬼餘，因真實人生告訴我，根本賭博、墮胎、娼妓已早早「合法化」，只不過大家詐聾詐盲，又或扮衛道之士，硬要攞嚟拗，認真多餘。
　　
不過，多餘都要攞嚟拗，以展示香港社會多元化。
　　
「XX」中，最假道學為「賭博應否合法化」。你知我知，香港由始至終都是一個大賭場，小市民賭馬、搓麻將，略有錢的賭股票、賭外匯、賭期貨、賭樓市物業（美其名「投資」，其實自己呃自己）⋯⋯
　　
香港呢個大賭場，N咁多賭博品種，多一種唔多，少一種唔少，其實每隻股票又或ETF上市，已是多一樣賭博。
　　
所以，早年拗生拗死應否容許賭波（當然美化叫做「足智彩」啦），我都唔知有乜好拗。
　　
事實香港三大稅收中，若果冇咗股票及博彩稅，庫房冧檔都似。尤其如今靠跑馬真係死得，因需要龐大人力物力及資源營運，完全冇錢賺。
　　
開賭波則相反，乜都唔使做，Free Ride外國賽事，就可以天降甘霖，你話幾正。
　　
所以，如今政府乾塘，又由治入興，有人提出增加籃球合法投注（叫「籃智彩」？），作狀掟出嚟畀衛道之士踩兩句後，又過㗎喇。
　　
正是多樣唔多，少樣唔少，拗都嘥氣。
　　
今晚快活谷賽事，一千米短途形勢明顯，韋達隻「顏色王子」夠鐘起筷，今季跑咗兩場同程，兩皆第三，準到飛起，WP及做Q膽可也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。