【曾智華專欄】《Run For Girls》

香港各類慈善組織數以千計，間間要宣傳，間間要捐款，所以，小弟呢類傳媒人，長年有不同機構找上門，要求幫忙。
　　
其實慈善界一如社會上各類界別，有的正派，有的邪邪哋。當然，正派的佔大多數，尤其歷史悠久而有口碑的，我一定會幫得幾多幫幾多。
　　
最近資深傳媒老友盧炳松來電：「碌Sir，我加入咗國際培幼會（香港支部）做義務董事，搞緊個大型活動《Run For Girls 2024》，最大目標並非籌款，而是喚起世人關注，如今全球落後國家仍有不少幼童，尤其是女的，活在水深火熱之中。」
　　
「盧兄，得！等我自己搵資料睇睇，再判斷幫到手否。」
　　
一睇，咦，值得幫喎。因此組織有長遠歷史背景，1937年成立，冇政府、政治及宗教背景，純為一群英國有心人，睇到當時全球無數兒童活在不公平境況。
　　
尤其多個落後國家，極度重男輕女，女孩被歧視、排斥及虐待比比皆是，根本無法健康地成長。
　　
其實大半世紀前，不但第三世界國家，甚至香港，也有同類情況。故此，培幼會1959年開始在香港提供服務，直至1973年，期間協助約萬二名兒童度過困難歲月，著名導演張堅庭正是受惠者之一。張導演後來也成了培幼會大使，四出宣傳這機構的使命及自己的故事。
　　
每個慈善組織為爭取支持，必須令善長留下深刻印象，故此，多有一個明確口號及「招牌活動」，年年舉行，喚起大眾的關注。
　　
培幼會的招牌活動名「《愛．女孩》起跑」（《Run for Girls》），2017年開始年年舉行，今年的D-Day為4月13日，大家有機會上網睇睇，會發現活動Logo極之搶眼，充滿動感。這活動小弟百分百支持，因實在有意義！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。