魯振順笑談「母子」關係：分房瞓玩神交 頂唔順軍訓管治女友昇華變阿媽丨獨家

66歲魯振順(順順)一直被誤會是同性戀，直至3年前高調宣布有女朋友，幸運兒是40多年前於歌唱比賽認識，細他6歲的Julie，拍拖僅4個月，順順即落實翌年娶妻，兩人更過住同居試婚生活及驗精準備生仔。不過，黃昏婚禮等極都冇，去年5月，順順改稱Julie為「老母」，更指兩人如同母子般血脈相連，坦言，「我哋係靈魂伴侶，應承幫佢生養死葬。」採訪：方騫平

魯振順冇Julie管後變得風騷。

 

順順最愛做自由人。

 

𠵱家跟Julie相處最舒服。

 

順順話「登六」後唔使性生活。

 

魯振順感恩每一天。

 

魯振順嘅婚訊講足3年，最後女友昇華至「順媽」，當然婚事亦告吹。對於被指煲「無米粥」呃曝光，順順有啲勞氣：「佢為乜要同我夾(新聞)呀？佢有佢嘅社交圈子，都住埋一齊啦。」他解釋，曾於Julie身上得到前所未有嘅感覺，直覺是已故「老母」派來照顧他：「有佢包家鄉餃子畀我食，感覺唔錯呀。」

兩人於3年前曾籌備婚事。

 

順順指Julie有已故媽咪的影子。

 

順順跟Julie在43年前嘅歌唱比賽認識。

 

Julie曾以女友身份跟順順做無綫節目《日日媽媽聲》嘉賓。

 

兩人拍拖期間會同圈內朋友共聚。

 

順順申訴大會

可惜熱戀過後，順順嫌Julie囉嗦控制欲強，收樓搞裝修又奄尖聲悶，似「老母」多過似老婆，諸多投訴令兩人關係生變，順順滿肚鬱結，越數越多：「佢之前因為搞間屋裝修瘦咗好多，由航空母艦變咗軍艦；最慘我又唔係成日去蒲，但佢乜都要知、乜都要查、乜都要管、乜都要睇，有少少唔鐘意就追住問『邊個嚟㗎？』越相處得耐，越發覺唔係想像中有咁多空間，我單身寡佬幾十年自由自在，都幾怕呢樣嘢。」順順坦言當正女方係『老母』，「即係精神、靈魂伴侶，學家燕姐(薛家燕)話齋，我哋呢啲年紀只係搵個互相依靠嘅老伴，同『老母』一齊有住家飯食，只係交代，唔返嚟食飯就得…」語畢，順順再笑住踩多兩句：「不過，佢包唔返我『老母』嘅餃子味道，而且佢比我『老母』粗心大意。」

魯振順𠱁得「老母」Julie好開心。

 

順順偷影「老母」攬狗搞笑生活照。

 

Julie不時包餃子畀順順食。

 

去年情人節Julie發表愛的宣言。

 

順順有好味住家飯食。

 

Julie曾在社交網開直播。

 

家燕姐都有靈魂伴侶。

 

關係更勝從前

Julie跟順順協議變「母子」，關係更勝從前，他搞笑說：「所謂夫妻如衣服，我反而答應負責幫『老母』生養死葬，唔簽紙反而唔會有束縛，好彩因為疫情將婚期煞停，大家年紀都大啦，佢明年60歲，死時再加3歲就變63喇，唔好搞咁多嘢。」順順指Julie跟他一樣父母已離世，所以佢好渴望有家庭生活：「將心比心會𠱁得佢開開心心過每一日，不時帶啲歡樂畀佢；屋企佈置到有家的感覺，又會夾期一齊去旅行，共同話題離不開3個小朋友(愛犬)。我仲會畀家用『老母』，飲宴時會包走啲食物畀佢，只係大家關係唔同咗，大家各有交友自由，如果佢搵到個比我更好嘅咪好囉，我仲多個『老竇』，有多個照應更好。當大家都有頂頸時候，咪各自返房。」順順更強調：「𠵱家健康最重要，珍惜及感恩每一天有得食有得住，過啲簡簡單單嘅生活已足夠，唔好畀咁大壓力自己。」

 

魯振順、Julie會互相照顧。

 

平日順順有自己嘅生活圈子。

 

一把年紀最緊要健康及開心。

 

「登六」冇性生活

順順坦言已同「老母」分房瞓，其中一個原因係年紀大咗，分房瞓會衛生啲，他解釋：「男人年紀大經常要去廁所，大家作息及習慣都唔同，無謂影響到老伴，而且兩人嘅鼻鼾聲都大。」順順又自爆『登六』後唔使有性生活，他更抵死說：「我哋神交就得喇！哈…真㗎，唔使搞咁多喎。」追問Julie變身「老母」前，兩人曾否有過情侶間的親熱行為？順順鬼馬回應：「冇就呃你啦，否則點知佢鼻鼾聲大？」活在當下的他又風騷高唱周聰嘅經典歌《快樂伴侶》：「尋伴侶大眾歡樂趣，求淑女愛她痴心最，日日快樂唱隨，做一對好佳侶...」

順順演過嘅角色曾令人誤會係同性戀者。

 

順順1979年報讀TVB第八期藝訓班，同期學員有廖啟智(已故)、黃造時、湯鎮業、李成昌、艾威、景黛音、陳安瑩、馬敏兒等。

 

原來型佬湯鎮業係順順藝訓班同學。

 

順順跟肥媽及李龍基都傾得埋。

 

魯振順正忙拍新劇。

 

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。