《滯留生》被世界遺棄不可怕丨頭條戲場

電影發生於1970年聖誕節前後，背景是美國新英格蘭的巴頓學院，古文明史老師Paul (Paul Giamatti飾)、寄宿生Angus(Dominic Sessa飾)及學校飯堂女主廚Mary(Da'Vine Joy Randolph飾)，在聖誕假期被迫留校，冇譁眾取寵，冇千軍萬馬，更加冇左扭右兜的懶煽情金句，三位寂寞的心由互相討厭到融洽相處，繼而圍爐取暖，擁抱彼此，好耐未試過睇一套戲，真摯、感人、溫聲、有超強人情味之餘，仲要好好笑，完全唔覺片長133分鐘，日後聖誕節翻煲片單又多一套。介紹返，本人的最佳電影。(上映中) 撰文:廖思慧

Paul Sir因為太正直所以不受同事歡迎。

 

古文明史老師Paul Sir未結婚亦冇女朋友，Angus同Mary鼓勵佢追女仔。

 

 

Da'Vine Joy Randolph橫掃本屆所有電影頒獎禮的女配角獎。

 

Mary是「學習如何享受爛生活」 課程的高材生。

 

飾演Angus的Dominic Sessa首次拍戲，同老戲骨Paul Giamatti好有火花。

 

如果呢套戲有港版，193好啱做呢個角色。

 

 

Da'Vine Joy Randolph憑《滯留生》已經獲得英國電影學院獎(BAFTA Awards）及金球獎（Golden Globes)等共38個女配角獎，新鮮熱辣再擸埋奧斯卡最佳女配角，橫掃本屆所有電影頒獎禮，超勁。戲中她飾演剛經歷喪子之痛的失意女廚師，對白唔多但句句有意思，聖誕Party夜飲大兩杯感懷身世一幕，Feel到好痛，祝福所有善良的人。

寂寞的心圍爐俱樂部
聖誕前夕大雪紛飛，小鎮寄宿學校師生全部趕返屋企過節，Paul Sir因為長期揸正嚟做，堅持唔放水畀捐獻者的兒子考試合格而得罪高層，聖誕長假被罰留校做全科老師兼保母，罪名是唔識做人。寄宿生Angus因為阿媽改嫁掛住渡蜜月，冇時間陪仔，有情緒病的他萬般不願留校過節，日日西口西面搵位反叛，又跟孤僻兼冇情講的Paul Sir秒秒頂撞，但估佢唔到加埋心碎女廚師竟產生溫暖到爆的化學反應。

留校生本來唔止Angus，只能嘆句天意弄人。

 

被困學校都可以慶祝聖誕嘅，首先入手甩頭甩骨聖誕樹。

 

然後再搵嚟唔知放咗幾耐嘅酒。

 

兩人生活之日常，你鬧吓我，我又窒吓你。

 

麻煩學生加超麻煩阿Sir，由互睇唔順眼到為對方著想，成個心暖晒。

 

因為講述1970年嘅事，電影拍出陳年電影感，好鬼正。

 

Angus出咗事，Mary放低所有嘢陪伴在側。

 

最鍾意電影冇老土說教，三位失意人至全片完都冇解決過任何問題，但笑容多咗，做人睇開啲真係好重要，觀眾好似跟三位主角上了一堂人生課，課程名稱是「學習如何享受爛生活」。溫提，香港只作限量上映。

一場大雪加三個孤獨的人，在一間老派寄宿學校發生的動人故事。

 

三個寂寞的心仲一齊倒數。

 

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。