【曾智華專欄】睇場波可以去到幾盡？

歐洲足球真的好看，不過，今年法甲、意甲、德甲及西甲皆少少被比下去，因英超大放光芒。
　　
欣賞足球，眼見的是場上二十二位球員表演，但資深球迷會睇更高一個層次，研究領隊如何調教球隊，看排陣，看布局，看策略，同時看佢有乜本事令球隊生生不息，栽培出一個又一個新星接棒。
　　
這方面昔日曼聯的費爵爺最巴閉，氣場勁，夠威嚴，故可彈離對手。
　　
今個世代又如何？再講惡，一定唔得。出色領隊須能閱讀所有球員心態，然後當仔咁逐個「湊」。最後就是Team Building，令全隊一條心。
　　
喂，好難㗎！因球星是人，必定有自信自尊自傲，甚至自大。簡單，若你隊波有個C朗在，要佢放棄自我，融入球隊不分彼此？過去二十年有邊個時期會得？
　　
今屆英超好睇到爆，因兩大超晒班領隊哥迪奧拿（曼城）及高普（利物浦）似在玩馬拉松惡鬥。英超榜叮噹馬頭，未到5月，難分勝負。
　　
兩位領隊兩個風格，哥迪沉着寡言，高普則熱情狂野，皆極具星味，也交出亮麗成績。
　　
不過很可惜，兩雄相遇，下季冇喇。高普決定引退，因體內能量燃燒過勁而耗盡，需要停下來回氣，決定季後會拜拜英超。
　　
消息一出，效果係乜？第一，下季哥迪可能變無敵是最寂寞；第二，由現在到季尾，每場利物浦賽事必爆。
　　
爆中之爆為利記最後一場，因場面肯定極度感人，大量死忠粉會喊到收唔到聲，幾萬人必一齊唱《You'll Never Walk Alone》送別高普。
　　
小弟老友K為忠貞利迷，誇張到早早買咗張三萬蚊門券，飛過去入場。
　　
「碌Sir，有今生無來世，破產都要參與呢個歷史時刻，連機票、酒店要十萬蚊㗎！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。