57歲葛民輝未Out過自揭瓣瓣掂秘訣 爆笑啄住麗英唔放疑惑搵童工丨獨家

57歲葛民輝跟鍾雪瑩、鄧麗英和潘宗孝（ERN9）在電影《填詞L》首度合作，電影講追夢，眾人現實亦曾為追夢做過唔同工作，分別有賣演唱會周邊、做補習Miss等；而由細到大冇明確目標的阿葛，全靠冇畀自己框框乜都做，結果DJ、室內設計及時裝都做得有聲有色。採訪：杜杜 攝影：朱偉彥 髮型:Ruth Lam(鍾雪瑩)、Oscar Ngan(麗英) 化妝:Cathy Zhang(鍾雪瑩)、Deep Choi&Eva Chan(麗英) 服裝:MAX&Co.(麗英)

鍾雪、阿葛、麗英和ERN9拍攝時未有太多機會相處，宣傳才令他們變熟絡不停講笑。

 

阿葛不論講自身經歷或是品評一班後生，一貫風趣幽默。

 

鍾雪開心首度跟阿葛合作，「父女」關係亦相當不錯。

 

鍾雪由2019年起以筆名「鍾說」填詞，合作歌手有洪嘉豪。

 

鍾雪憑電影除提名香港金像獎最佳女主角，早前亦獲金馬獎提名。

 

戲中阿葛演鍾雪及ERN9的爸爸，由於故事根據導演黃綺琳的真實經歷改編，即阿葛就是黃綺琳的父親，阿葛笑言當初獲導演邀請時反應好大，「佢覺得我好似佢老竇，我話睬！哈哈！佢話性格好似，叫我試吓幫佢就好快應承，送佢一程，橫掂你咁鍾意投資電影咯，撐你落埋去啦！」講到首次合作的一眾後輩，阿葛發揮幽默本色，「佢哋都好專業，好快入手，聽得多新演員做訪問，原來都係老鬼嚟，ERN9已拖幾條友剪埋片拍嘢上平台，即係成個電視啦。呢個麗英由小學開始已經唱「Sailor Moon」（美少女戰士），唱咗幾10年歌。阿女（鍾雪）原來又係老雞嚟，又驅風又盛。」阿葛跟戲中演ERN9女友的麗英冇對手戲，到謝票才知有個「新抱仔」，「趁我返鄉下嗒咗我個仔！」

戲中阿葛演ERN9和鍾雪兩兄妹的爸爸。

 

阿葛戲中演默默支持個女追夢的好爸爸。

 

劇中鍾雪撞破阿哥（ERN9）同麗英親密關係。

 

興奮跟兒時偶像合作

三位後輩自細已聽過阿葛大名，經接觸後，鍾雪對「爸爸」更尊敬，「佢好認真、謹慎，好樂於畀意見，現場見黃綺琳有啲甩漏，就會攝吓攝吓埋去一齊傾。」阿葛搞笑回應：「我提佢咩？放飯嗰啲呀？哈哈！」再解釋知道監製黃鐦和導演自資很難，「喺真住宅拍，唔可以over超晒資，有時阿鐦同導演好似魂遊慢咗，係咪有啲嘢唔通或者唔方便同我講？我就忍唔住埋去撩吓。」ERN9的日本時裝界朋友也視阿葛為偶像，心情自然複雜，「興奮但係又要壓制住，唔可以fans上身，簽名嗰啲擺到最後。」麗英雖跟阿葛冇對手戲，幸好謝票補數，「嫁咗咁耐都見唔到面，哈哈！」 阿葛笑言，「謝票覺得佢好活潑，唔知佢係邊個，矮得得，點解搵童工呢？！好似未成年，我個仔會唔會打藤㗎？！」

麗英和ERN9在戲中首次合演情侶。

 

阿葛忽然多咗個「新抱仔」麗英，相當多意見發表，笑死！

 

鍾雪畫韓星周邊產品搵錢

電影以做填詞人追夢為主題，鍾雪自爆戲中整演唱會周邊產品賺外快，是她的親身經歷，「黃綺琳問我有冇嘢貢獻吓，我話升大學時，整過演唱會周邊產品，嗰時好興《MAMA》啲韓星。」葛爸話：「梗係啦！唔使畀版權㗎嘛！」鍾雪解釋：「我哋自己畫㗎！」ERN9於疫情時在日本生活3年，為媒體拍旅遊片，「拍搵錢片好少時間拍自己想做嘅嘢，日本經濟狂跌，嗰時28歲返香港由頭嚟過，目標一年後有穩定經濟做返鍾意嘅幕前，結果由《試當真》幕後變幕前，兩個目標都完成咗。」麗英就考了幾次演藝學院都不成功，令她很迷失，「我用排除法，老咗想做咩？除咗表演、唱歌同做戲，完全諗唔到乜嘢係好想做。」結果她靠其他工作支撐追夢，「幫人補習，再返啲workshop，好彩入咗《小薯茄》。」

鍾雪和麗英在戲中賣演唱會周邊產品，原來取材自鍾雪經歷。

 

ERN9在日本3年靠拍旅遊片，支持自己追夢。

 

一心想做歌手的麗英，去年終舉行首個演唱會圓夢。

 

阿葛從冇諗過做到DJ

阿葛直言自細冇特別夢想，做DJ都是機緣巧合，因當年要有把靚聲才有資格做，「雞仔聲咁『B呢巴啦』，又有懶音，唔會覺得自己入呢行。」從名校華仁畢業後，盲樁樁去讀設計，「會考唔係機關槍（F）就擔梯（H），得中英數同地理合格，冇諗過讀預科，攞完成績，同學想讀理工fashion，佢話去隔籬街面試，有間明愛成人教育中心好易收，我見近就跟咗條友去咗白英泥（明愛白英奇專業學校）。」阿葛選讀廣告設計因哥哥亦做這行，「嘗試理解廣告設計係咩？但見佢通宵達旦，又要招呼客happy hour飲啤酒，唔似睇電視、電影林子祥嗰啲好勁。」當他發現廣告設計非如想像，決定再搵出路，「喺白英泥讀咗1年，第2年林海峰繼續，我好快轉咗做時裝。」他又寄語年輕人不要為未來設限，「我讀廣告，但出嚟變咗做display，點解要讀完先做得嗰行？！就算室內設計做裝修，我冇做過㗎，又冇讀過時裝，好多唔需要讀，好似我冇讀過電台訓練班都可以做喎！諗個方法去做嗰件事囉，think out of the box。」

阿葛跟林海峰組成「軟硬天師」，由DJ變組合，更多次開騷。

 

阿葛搞時裝多時，早已成立個人品牌「4A like Black」 。

 

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

 

《星島頭條》新網站有更多精彩內容：http://www.stheadline.com/

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。