【曾智華專欄】踏扁條「蟲」即威威

周三專欄小弟大力踩「過江蟲」湯普新屎斗，以及請佢來的馬會高層「有眼無珠」，哈哈，似乎有啲「藥效」，條「蟲」即鑽出地面，爆四十一倍大冷贏馬，不過，之後繼續陣上失蹤！且看明天賽事表現如何。
　　
明日跑「女皇銀禧紀念盃」（會好快改名？）千四米，明星馬紛列陣。
　　
呢場不似「香港經典盃」般，全部是目標跑打吡的四歲馬，隻隻未到大賽日，幾大冚手，不少根本未谷到巔峰，冇畀你睇晒。走光的「禪勝輝煌」及「大至尊」，未必是真命天子！
　　
明日除「錶之銀河」外，全部都是舊馬，有幾多料已見晒，問題只是出擊意欲。今場我想逐隻講！
　　
一、「金鑽貴人」：上次甩轆，未知為何，始終王者，一定要拖！
　　
二、「加州星球」：上季光芒四射巨星，今季贏完一場二級賽後，已覺急速走下坡，潘頓唔吼是最大顯示。千四米也已嫌短，可以放棄。
　　
三、「永遠美麗」：本屬千四米王者，但今季落腳轉慢，改跑千六米。早前一級賽入Q，但輸近個半馬位，今次縮程千四米，難以看好。
　　
四、「美麗同享」：七歲，老嘞，上季未贏過，今季更冇可能突然變身，只可間中偷雞入吓位置賺獎金，要入Q太勉強，唔使預佢。
　　
五、「幸運有您」：今季處高峰，出四次一W兩Q一第四。兩Q在一級賽千二米取得，今次增程，入腳！
　　
六、「健康愉快」：近三季五跑一級賽皆無法入前五，根本未夠班，出戰純湊熱鬧，飛得！
　　
七、「神虎龍駒」：千四米專家，一定會前列回來，要！
　　
八、「小霸王」：快活谷出賽準到飛起，一過沙田即判若兩馬，千四米未跑過，唔使要！
　　
九、「紅運帝王」：典型吼準才起筷馬，上次一班賽執咗一場，今次級制賽，應先唞一唞！
　
十、「錶之銀河」：上周跑假，今次你就知味！
　　
「金鑽貴人」、「幸運有您」、「神虎龍駒」、「錶之銀河」互串啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。