【曾智華專欄】「過江蟲」湯普新

近日香港馬圈最多人關注的「主角」，並非「軟硬鞭」潘頓，也非布文，又或馬會主席、總裁等，而是一個「神奇騎師」湯普新。
　　
點解佢咁神奇？第一，渣波到咁款，竟然得到馬會大員（邊個落決定㗎？）禮聘到港策騎，有人「盲公陳」上身乎？第二，相信應該是「前無古人」，作為「過江龍」，來到香港，竟可以跑足四十七場而一直只能扮演「無影俠」，連一席第四都冇，水蛋到非常得人驚！更難以解釋，佢一路騎一路輸，但竟然個個賽馬日有不少坐騎，上周日又有六匹，與香港騎師榜上的「六哥」巴度看齊，更勁過幾位騎功遠畀佢優勝的外來騎師，如霍宏聲（三匹）、董明朗（五匹）及賀銘年（四匹），難明！
　　
呢條「過江蟲」創下歷史瘀爆紀錄，當然引起多方亂噏界蜂擁品評嘲笑，例如：一、改壞名啦，叫湯普新，即擺明是個畀人「劏」的普通「新仔」啦；二、有佢在，正呀，場場睇少隻！
　　
不過，乜都有人從另一角度睇。例如：「佢渣成咁，未必因騎功有關㗎，大佬，你試吓畀嗰四十七匹馬潘頓跑呀，咪一樣輸死未天光！」
　　
哈哈，咁反智嘅藉口都講得出。
　　
成日聽見人講：「當你唔尷尬時，尷尬的，就是其他人！」呢個講法，用在湯普新身上，啱唔啱呢？而佢搞成咁，渣成咁，請佢到港的馬會高層，又是否應向所有馬圈持份者有個交代呢？
　　
其實睇此君的投注票，部分坐騎是有的，極可能不少賭仔夾疊賭佢開齋，希望爆出一隻，執返輸去的。
　　
我就冇咁「癡心情長劍」嘞。佢初來時，已見佢窒吓窒吓跑，又唔識走位，斗零都冇買！
　　
究竟佢輸到幾時，先會/肯/被請走？
　　
今晚快活谷賽事，提供「赤兔猴王」，過去五仗1W3Q1P，巔峰！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。