【曾智華專欄】小心「周身火」人物

近幾年香港經濟實在極差，加上整個社會氣氛也因這樣那樣的問題，令不少市民情緒極大波動，故此，不時見公眾地方有人失控，或粗口互罵，或動手動腳，郁郁就扯火。
　　
日前小弟拖住旅行篋搭𨋢，步出𨋢時，輕輕觸及前面一名六呎高男子，嘩，對方極大反應，高聲喝道：「你知唔知你撞親我？」遇上呢種情況，斯文人，當然大事化小，立即道歉：「唔好意思，唔好意思。」
　　
對方立即軟化，未夠，更神奇，當佢見到我個貓樣時，竟由扮晒大怒變和顏悅色，細細聲在女伴耳邊笑笑口講幾句，然後兩人甜甜蜜蜜拖手離開。
　　
講到香港的「火球人」，有幾款大家小心。第一款當然最多，正是過去幾年上咗車買樓的，大部分蝕到喊阿媽兼變負資產。見到佢哋，千祈咪口多多講：「投資嘅嘢，唔係賺就係蝕㗎啦，食得鹹魚抵得渴。樓價升時你唔會同人分利，跌時當然也冇得博同情，硬食㗎！」
　　
講的可能有道理，但聽在苦主耳裏，肯定火都嚟埋，朋友都冇得做。
　　
另外，也有兩類「火球人」，政府官員面對，也必須小心處理，絕不可以為有權大晒，又或公理在我手，正是的士及小巴車主（當然包括大量炒家）。
　　
的士牌曾幾何時炒到飛起，高達七百二十三萬元，時為2015年，之後任何位入皆坐艇，如今跌至三百四十萬元左右，意即不少車主蝕到啞咗，正在被銀行Call Loan。
　　
小巴？更大大大大鑊，牌價暴跌九成，斷供已成大勢，冇人再願意死頂。這個行業根本唔知點再行下去，才能收科！如此環境，想唔「周身火」搵人發洩就難，大家將心比己就知。記住，切勿刺激佢哋呀。　

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。