【曾智華專欄】全港馬路是「政府金礦」

上周四雞啼咁早，一踏入茶記，已聽到成班的士大哥拆天咁嘈，當然粗口滿天飛，擺明要發洩！
　　
肥A：「嘩，真係聞所未聞！政府做服務就話有KPI（工作成效指標）啫，嘩，原來捉人犯法都有？有冇搞錯呀？」
　　
高B：「肥A，你噏乜呀？未聽過警察拉人有指標㗎喎，難道鼓勵人犯法再拉？未夠數就鼓勵多啲人打劫、行竊、非禮、行騙⋯⋯冇人犯法，世界和平，唔好咩？」
　　
矮C：「B佬，肥A講嘅，係我同你不停食嘅牛肉乾呀，懵佬！真荒謬，原來財政司司長年年開出個『估計』，每年應該抄幾多，列『政府收入』㗎。老老實實吖，抄牌咁乞人憎，若冇KPI，我做警察都側側膊啦，點解要做醜人，破壞警民關係喎？」
　　
肥A：「咪係囉。一有指令，唔願做都要做，原來一年派出牛肉乾超過三百萬張，庫房收入近十億元。所以，4月開始又醒定喇，因為新財政年度，警方當然想盡快『達標』，以免唔夠數，臨尾追到氣咳！」
　　
高B：「成日有啲涼薄友話：『唓，你班友，想唔畀人抄牌，咪唔好非法泊車囉。』我一聽就想質拳佢歎（好暴力，講吓好喇），香港司機十之七八其實都想守法，點會冒險收三百二十元牛肉乾咁變態？問題係，你政府車牌就大量發，收牌費收到『嘭嘭聲』，但批車位就遠遠不成比例，咁係乜意思先？」
　　
矮C：「乜意思？意思就係兩邊食盡。車牌猛出先收一筆，『逼』你非法泊車抄牌，再斬一筆，咁都唔明，你新嚟㗎咩？」
　　
聽完班大哥呻之後，小弟幾乎立即中招。因到土瓜灣街市買雞翼，諗住一分鐘搞掂，望望街頭街尾冇警察，即跳落車。說時遲，那時快，已有人大嗌：「抄牌呀！」咦，咁鬼「幽靈化」㗎，邊處突然飄出嚟嘅呢？　

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。