【曾智華專欄】條友好少出晒奶力

過去幾日馬圈圍內人及資深馬迷間瘋傳一條片，人人睇到標眼淚，乃是練馬師沈集成在「浪漫勇士」奪得香港金盃後，開心到爆，接受記者訪問時真情流露，漏咗一句有關潘頓的過癮評語：「好少見潘頓咁落力，條友今次真係出晒奶力呀！」講完，即知漏了「重要口風」，尷尷尬尬。
　　
英諺語有云：Slip Of The Tongue。即係乜？即係你本來唔想講嗰句都講埋，但此乃心中真像也。這種口誤，有時會引來大禍，但有時則似沈集成般，帶來無窮娛樂性。
　　
這點亦印證了小弟「封」畀潘頓的綽號「軟硬鞭」，絕對有其圈內人盡皆知的策騎慣性——條友好少咁落力！點解？真係解都無謂！本欄長期指出競賽小組凡遇上「軟硬鞭」，就會突然變「盲公陳」，但捉其他騎師則往往是「精明眼」。這種執法尺度，龍門任擺，總之我話啱就啱，看台及傳媒當然噓聲響徹雲霄。
　　
明日又跑大賽，總獎金一千三百萬元的香港經典盃，當然又是超級騎師食大茶飯日子。
　　
呢場特色有二：第一為跑沙田千八米，不少馬從未跑過；第二，部分馬真正實力仍然「冚手」，因目標是大茶飯的二千米打吡大賽，到時總獎金二千六百萬元。若有馬能「冚」到大賽日時才見真章，嚇你一跳，咁就娛樂性勁爆錶。
　　
牌面「驕陽明駒」及「喜蓮勇感」實力彈離，兩駒的馬主皆有極強勢力背景，肯定冇乜人敢出蠱惑，只差策略上是否在呢場跑盡矣。
　　
我會用呢兩匹做二重彩指定一、二位置馬膽，再以六匹未見底的放第二位，包括「安騁」、「勁速威龍」、「極速奇兵」、「嘉應傳承」、「超超比」及「久久為尊」。十蚊一注，共一百四十元！
　　
明日蔡廄應W埋「鐵金剛」！