【曾智華專欄】巨星馬無以為繼

任何一個行業，要長期興盛，必須生生不息，優質新血不斷湧現。
　　
香港馬圈當然也應如是，必須練馬師、騎師及馬匹三大元素有足夠後來者接力。
　　
三大瓣中，練馬師最冇問題，本地薑實力絕對足與過江龍拗手瓜，一較高下，令人放心。
　　
騎師？當然是大問題！「軟硬鞭」潘頓一家獨大，點解會咁？是否涉及「深層次利益」？我唔識亦唔知，只知咁搞法，非常之不健康！點拆局？麻煩馬會主席及總裁諗掂佢！
　　
第三瓣，也極之令人頭痛，正是明星馬日比日少，巨星馬更似將會斷纜！「金鎗六十」、「浪漫勇士」、「遨遊氣泡」及「金鑽貴人」四大馬王之後，邊隻接力？「金鎗六十」幾乎肯定今季退役，拜拜去也。
　　
「金鑽貴人」五歲，看來潛質已盡，難以再進。上場輸馬跑第六，是否一個體力轉捩點警號？未肯定，再睇多場即知。不過，難存厚望。
　　
「浪漫勇士」仍當打，但馬如運動員，必定會老化，六歲了，很難再創高峰。
　　
「遨遊氣泡」五歲，應仍會有多少進步。
　　
總結，四匹馬王，只有一匹「遨遊氣泡」可以憧憬。咁之後呢？
　　
睇來睇去，看台公論，只有蔡約翰的「驕陽明駒」擁有巨星潛質，應是下一匹馬王。不過蔡神仙「用馬」會用到好盡，故此可能一兩季就玩殘退役。若如此，香港成個馬壇可能冇晒巨星馬接力，咁下次國際賽點搞？又點可繼續衝出國際？
　　
講返今晚快活谷賽事，三班千二米第一組，五隻有機會——「添開心」、「精算暴雪」、「知道長勝」、「撼天鐵翼」及「八駿巨昇」。
　　
「八駿巨星」今次抽得靚檔，鍾易禮課課摸實狂操，再加千二米谷閘第一，誠意百分百！一於用佢做二重彩複式膽，拖其他四隻，再加Q、PQ！