【曾智華專欄】搶律師

香港行行爆人才荒，不少做管理的老友搞笑說：「碌Sir，香港開埠以來，從未試過如此，做打工仔，個個如今可以畀面色老闆、上司睇嘞，因東家唔打，立即可以打南西北家，分分鐘仲會加人工。所以，唔係誇張，不少工種一有人見工即請，但求對方識『呼吸』，頂住先！」
　　
以上一半講笑，一半講真。尤其餐飲、清潔及保安，從未見有如此狂大的流動性。
　　
專業崗位又如何？一樣！特別是教師、社工及NGO內的所有工種。聽講唯一好少少為醫生，因在香港個個屬「天之驕子」，但一踏出本城，極難在其他國家搵到接近的薪酬，更何況必須納重稅？
　　
小弟有幸已「收工」，唔使做管理及請人，但對「搵工跳糟」最新行情非常有興趣，不時睇求職網及報章「搵米版」，睇睇有乜發現。
　　
呢呢，最近正正發現有一行也是搶人搶到飛起——律師！
　　
而出猛手搶人的竟是律政署，擺明去到非常之Desperate，大力呼籲各位人才唔該快快應徵！
　　
點解咁？唔知，可能是原本署內的律師大量流失，出外「撈」或移民啩。也有可能呢幾年工作量大增，因早前積落的案要清。無論如何，就是打晒鑼搵人，只要你肯參加律政司的「律政人員計劃」，咁你在其他部門工作也好（向政府內部及公營機構搶！），讀緊大學也好，律政司都想搶；渴求到你明年甚或後年（2026年）才取得法學專業證書的，也想「落釘」！
　　
出手如何？開波就月薪60,065元至62,895元。即你在專上學院一畢業，就年入七十多萬元！相信除醫科外，絕難有大學畢業生如此「身嬌肉貴」？
　　
不過，律政司咁搞法，會否搶盡所有新畢業律師仔而將私人市場人才完全扯乾？我好想知！