【曾智華專欄】年糕質素報告

經過三星期用盡九牛二虎之力，終將雪櫃內所有年糕清倉，完成「大業」後，起碼要到年中才有興趣接近任何糕點！
　　
今個新年，嘗到的年糕品種，比過往任何一年多，因大量朋友玩「你送我、我送你」，於是試咗近十間食肆的出品。
　　
比較遺憾，以往幾年小弟大力介紹，由廉署前神探曹渭仁炮製的「神探年糕」，不再做了，頓感失落。老曹退休後任農夫，對製糕用的農產品要求非常之高，幾近完美才肯收貨，再加高質臘味、冬菇，樣樣執到正正，故做出的蘿蔔糕、芋頭糕，獨步香江咁好味。但事事總有完結的一天，可能太辛苦，又或體力問題，決定唔玩嘞，希望佢出年回心轉意啦。
　　
今年小弟食勻的年糕，最差的是由香港某個大飲食集團出品，一啖咬落成口粉，死死實實，用料差，且製作求求其其，全家一致認為唔合格，一人一件後，就全送堆填區！
　　
最美味的跑出兩間，皆屬第一次出糕。可能正因如此，在數量不多下，能夠集中火力搞出高質，望下年繼續。包括：
　　
一、亞洲水產旗下「師家菜」的龍躉金湯蘿蔔糕。這個集團專養優質無污染龍躉及各種石斑，除賣活魚外，也將魚燉湯。今年第一次用其招牌「龍躉金湯」搓糕，出來的味道，彈離所有競爭者。一出閘即研發成功，下年必有所提升，大家留意！
　　
二、Off Town Kitchen老闆Kobe與朋友合製的鵝肝腸蘿蔔糕。採用香港老牌名店手做鵝肝臘腸，而其他配料也是一等一，入口已覺與眾不同，鵝肝的香配合煎得焦燶的糕，撞出迷人味道。
　　
以上兩款，未知年底會否大量生產。有消息即在此公布，為食鬼留意！