【曾智華專欄】Avantgardey極過癮

每逢晚飯時間，我家皆會以YouTube送飯，由小兒及小女操控睇乜，多是睇時事的KOL（其實大部分佢哋未開口，我已知將會講乜 ），也有飲飲食食，若有熱辣娛樂新聞或八卦話題，也會瞄瞄。
　　
前晚「肥女B」揸住個遙控話：「肥爸，李龍基仲有乜好睇呀？講到殘晒啦，介紹你睇被形容為Mind Blowing（超級興奮，極度驚奇）的日本女子舞蹈團Avantgardey，保證一睇難忘！」
　　
佢撳撳撳！撳出Hit到爆的電視節目《American Got Talent》2023年決賽片段，咦，冠軍正是Avantgardey喎，睇睇有乜咁巴閉先。
　　
睇完佩服到五體投地，果然犀利。呢隊由日本著名編舞家akane組成的十九人舞蹈團，其表現不單止令人眼前一亮，再貼切啲，是每一秒都似令你眼睛在食興奮劑，廣東話形容——真係過癮到爆炸！
　　
成員全部劃一穿校服，髮型留齊海，動作百分百卡通式機械化，整齊到毫無瑕疵，動作難度似乎不是人的身體能做出。
　　
最好玩，個個眼神、面容古靈精怪得來超可愛，令你不期然上晒癮，一次兩次三次不停地睇。
　　
多謝肥女B好介紹，我呢個老餅真係懵懵哋，原來農曆年時，Avantgardey曾到港演出，小弟錯過咗現場近距離欣賞（旅發局本有邀請出席），真係揼心揼肺！
　　
算啦，反正佢哋剛剛爆紅，已接下大量演出邀請，將不停遊走國際間散布快樂情緒，總有機會遇上。
　　
「Avantgardey本來都排咗內地大Hit的『科目三』，並錄低上咗網。嘩，好彩畀N咁多專業人士大大聲喝停，立即下架！」肥女B醒目地指出。
　　
點解？老友，如今Avantgardey的舞蹈及形象經已爆紅全球，一切絕對應該獨家。以後所有曝光演出，必須自己原創，只有人抄佢，絕不可佢降格抄人，就咁簡單！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。