【曾智華專欄】布文、潘頓開大茶飯

香港騎師停賽制度幾過癮，正是騎師可以決定幾時停賽，故經常有押後情況。
　　
點解？簡單，冇大茶飯日子，停咪停囉。不過，一旦要食大茶飯，決定立即完全不同！
　　
周三賽事普普通通，故此，兩大高手布文及潘頓，決定選擇受罰先停賽，為的就是要在明天復出！因為總獎金一千三百萬元的香港金盃，就在明天舉行！
　　
老友，若贏一場，真係「火燒旗杆」，有排歎㗎！
　　
呢場跑二千米，所有練馬師皆精心部署，計到盡。若非針對呢場的「王者」級數良駒，一定唔出，以免耗力，又或挫敗英雄感，明顯「永遠美麗」正屬此類。因跑二千米多數不及「遨遊氣泡」及「浪漫勇士」，倒不如留力跑強項千六米的主席錦標及冠軍一哩賽，尤其後者，總獎金也有二千二百萬元！
　　
每匹馬皆有其里程，不可場場搏，一定要計得精準。本來蔡神仙的「自勝者強」是二千米強項精英，但非常可惜，去年11月11日，愛馬者無不同聲一哭，因此駒陣上跑斷腳！
　　
明天香港金盃，冇得爆冷嘞，因兩隻大超班的「遨遊氣泡」及「浪漫勇士」在陣，平磅出賽，你點偷雞？發夢就有可能！
　　
究竟邊隻先過終點？牌面是「浪漫勇士」，但經已六歲，加上在國際賽中搏到最後一滴，如今究竟能恢復多少元氣，成疑！今次大家必須留意「直線力山」，因在香港盃明顯受阻，才輸四分三馬位，明天伏兵一路！
　　
「遨遊氣泡」五歲，如日方中，仍在上升軌，評分未止，呢場將有進一步表現！
　　
總結，香港金盃三匹馬跑晒，故可用三隻串複式二重彩。我會加多注，「遨遊氣泡」行頭再一拖二，睇馬，各位，唔會好分㗎啦，當玩啦！