【曾智華專欄】一定要扮嘢

上周日全世界「政治分析員」預測中到開巷，泰國前總理獲得假釋，離開「歎」咗半年的私家豪華病房，回家去也。出院時在記者鏡頭前，他信戴頸箍又紮住右手，好似好唔掂咁款。

當晚與幾位老江湖晚飯，在座的「大狀K」灌完兩杯，嘻嘻笑說：「呢丁他信扮晒嘢，肯定有形象顧問指點啦。」佢講乜？正是「精明」犯人的慣性部署——扮慘！有咁慘扮咁慘，博被可憐、被同情，對象正是法官！

因為法官也是人，最憎被告牙擦擦懶叻頂嘴，如此多會判刑時靜靜重手少少。相反，若見到被告慘到飛起（無論真假），都可能有所觸動，判刑時會手鬆少少。所以，不少大狀也間中化身形象顧問，建議當事人上庭時，低調點、弱勢點⋯⋯

由此，大家就見到不少上年紀被告唔似平時咁染髮，反之以白髮蒼蒼見人。另外，更多的長者被告會扮行動不便，突然要坐輪椅或有護士攙扶。

富有的，例如大馬主及大富豪，更請齊專家證實自己「癌症末期」、心臟栓塞並開始腦退化，估計在世日子已不長。

通常你請得專家，又講到似層層，法官極少在這方面作挑戰，因自己非專家也。最搞笑，「大狀K」初出道時，經常接法援案，代表的不少是慣犯古惑仔，個個精甩辮，屬「甩身專家」，個別更是影帝級演員。

K哥曾遇上一個犯，尤其犀利。上庭時，擺明嚴重傷殘，拐吓拐吓，步步痛苦，面容也似天生扭曲，相當不幸。答法官提問時，又黐脷筋，又控制不了口水橫流，總之就是一個身世可憐的人，走投無路才犯法。法官開恩輕判。
　　
豈料丁友仔一離開法院，立時健步如飛，正常過你同我，服未？