【曾智華專欄】冠軍練馬師必有惡鬥

上周日TVB盃，小弟賽前在本欄將曾志偉大名曝光，立時畀貼士有壓力！幸不辱命中二重彩，較冷的「增有」行頭，都幾好分！
　　
跑馬，除睇每場比併外，也睇騎練在「大長途」中的較量。
　　
長期以來，香港騎師榜根本冇得鬥，尤其莫雷拉離開後，潘頓絕對可以「隻手遮天」。因騎功高，自然壟斷最好的馬，大量子彈任佢揀，二十一個馬房，基本只有方嘉柏與佢冇交易（背後當然有故事），根本冇騎師贏馬場數能接近佢。
　　
今季又係呢條「軟硬鞭」玩晒，騎師圈勢力嚴重失衡。
　　
不過，練馬師榜則不同，多位現役的皆曾做過冠軍，今季爭持尤為激烈！
　　
以馬論人，伍鵬志朝氣沖天，出閘狂放，未轉入直路，已彈離對手十多個馬位。人人問：「嘩嘩，今鋪邊有得追呀？」
　　
係真唔係真？我話唔係！全季比併是大長途，鵬仔將現役馬用盡後，就要研究佢仲有幾多子彈跟尾。每個馬房論實力，一定要睇新馬數量，因舊馬一過五歲，再進步機會甚微，大馬房必將估計再冇W的馬掃走，用空位入新貨。呢方面蔡約翰著數晒，旗下馬主大把水，馬販將最優質貨預留畀佢，又外地有牧場幫手預先訓練，對手根本冇得同佢鍊。蔡神仙馬房之內，未上過陣或未用盡的新馬有二十多匹，全部皆中高班質素，大部分可貢獻一至三W。
　　
反觀伍鵬志只得十六匹新馬，質素略略低，W機會未必肯定。
　　
總的睇，2月底開始，當蔡約翰一撳掣，戰績就會爆上，先趕過呂健威，然後⋯⋯我買佢將殺低埋伍鵬志嘞！睇睇中唔中？
　　
今晚研究第四場一班千二米。提供「順勢而飛」、「精靈勇士」及「魅力寶駒」，W、Q、PQ及二重彩啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。