【曾智華專欄】茶記應設「粗口特區」

香港人一定察覺到，過去幾年越來越多人變躁底，情緒高漲，不同年紀，包括老、中、青，講粗口的日比日多。
　　
這個當然與社會整體氣氛有關，絕非由一個人營造出來的。
　　
我明，但不等於我要二十四小時接受「粗口轟炸」，尤其是在開餐時候，若一邊食，一邊聽見性器官滿天飛，實在倒胃。不過，香港強調言論自由，當然包括講粗口自由，故此，除指定地方（公立醫院、公共交通內、港鐵站⋯⋯）外，根本冇法例規管班粗口精。
　　
最近小弟又有一煩惱，因朝朝去開的茶記（連鎖集團），來了一個粗口侍應（點解咁都要請？真係冇人到咁大鑊？），恍似食咗火藥，不停口噏噏爆粗。尤其當水吧出錯嘢時，更會咿咿哦哦，一邊行，一邊用粗口侮辱。
　　
最弊是剛剛遇上一位的士大叔，也是粗口狂，每朝七點打開報紙就鬧政府，乜都粗口狂插。本來單單大叔亂鋤，冇人回應，自會收聲。同樣，粗口侍應一個人咿咿哦哦，也不會出現大破壞，問題在當佢兩個搭在一起，就大件事，你一言，我一語，越X越興奮，越X越粗鄙。
　　
須知早上不少家長帶學童子女來食早餐，也有斯文OL在座。兩丁友肆無忌憚爆粗，會產生傳染性，令隔籬枱及個別侍應也加入。咁搞法，你話死唔死？
　　
小弟唔知點解間店變成咁，睇住學生、斯文客先則彈開幾張枱距離，再慢慢流失。
　　
呢種劣幣驅逐良幣現象，究竟在香港是否日漸普及呢？若是，為乜會發展成咁？
　　
我並非管理人，只是客人一個，唔喜歡，可以另覓地方。不過，拜拜前希望集團「翠X」負責人知道，不如先試試間開一個粗口特區比兩丁友先啦。