【曾智華專欄】雜碎電影，亂炒一通

五十年前到美國留學（香港冇大學收），當然對中國菜極度懷念。校園附近哪會有中國菜？只有「鬼佬式」唔湯唔水Chinese Cooking，大受歡迎為雞波（雞球上厚粉油炸，配甜酸汁）、咕嚕肉、炒飯及雜碎。
　　
第一次見識雜碎，係乜？乃餸頭餸尾加椰菜及芽菜亂炒一通，但老外食到舔舔脷。
　　
今日講雜碎，因剛剛睇完《飯氣攻心2》，直覺就是一套「雜碎電影」。即乜都有啲，炒埋一碟，並非好戲，但又未到一無是處。
　　
可能上套的成功，令導演兼編劇陳詠燊壓力太大，加上冇咗黃子華，於是，不自覺地（？）大量「加鹽加醋」。上次掂的人物及角色，無限放大用盡（最明顯是林明禎，上次唔鹹唔淡廣東話好笑，加造型可愛，今次就加重手去盡，結果出現反效果）。兼且可能信心不足或受昔日賀歲片影響，冇需要也無厘頭加入大量有知名度演員，不過，大部分是明顯硬生生插入，根本對戲味全無幫助。
　　
導演為Fit In大量有知名度的演員（共十六位），令人人有曝光，必須拖長嚟拍，播足兩個多小時。問題在電影拖長，若有真正需要（例如《奧本海默》或《花月殺手》一類），絕無問題，觀眾也不覺悶。但《飯氣》呢？由零分鐘開始到九十分鐘，根本可以剪去三十分鐘「閒戲」，若如此會更緊湊，質感更高，而不是悶場頻頻出現。
　　
此片完全冇欣賞價值？唔係！起碼三個賣點相當吸引：一、張繼聰唱跳《Monica》，舞技高，極好看；二、王菀之的喜劇感，非常可愛、非常搶，今次將林明禎比下去；三、謝君豪與張繼聰由扯火到互憐互賞一場戲極出色。君豪其實在本片不倫不類，幸在此場有充分發揮演技機會。