【曾智華專欄】一萬元起跳咪搞我

講飲食，小弟不算專門，但每周早午晚外食近十餐，故對香港飲食業市道及收費水平，有心中個量度表。即你的服務、你的出品及你的設計氣氛，收費應該屬邊一級。
　　
最近讀報，睇到行政會議召集人葉劉淑儀突然品評天馬苑商場，喚起我一個「奇特訂位回憶」，都幾難忘！
　　
話說年多前仍處疫情期，讀報章見到有間朝氣勃勃的新食肆，在天馬苑商場開業，賣點是夠膽在草根地區開高檔次餐館。負責人據聞曾在酒店中菜廳任廚師，如今自立門戶，選了願意平租的公屋商場，試試憑實力能否企穩。
　　
這故事吸引我致電訂位，準備約為食敢死隊老友殺去幫襯，一方面是新店，另一方面也希望支持有心有火者創業。
　　
電話接通，接聽的為一位女士，我道明來意：「想訂房間，十二位，X月X日，請問有冇位呢？」
　　
對方非常坦白：「先生，訂房最少消費一萬元，另加一。」
　　
老老實實，我當時真嚇一跳，天馬苑乃平民商場，你在嗰度開業，地點全不就腳，山旮旯咁遠，更要專誠身水身汗去（炎夏），竟敢獅子開大口，一萬元起跳？
　　
以為聽錯對方是陸羽、家全七福或富臨級數名店，夠膽要求這個價。算嘞，無緣。你開咁嘅價，若然做得住，真係恭喜你，但小弟實在冇必要用過萬元，試一間公屋商場食肆，講出來都必被多口為食老友柴台。
　　
放低電話後，本已忘記這間「高級」店。
　　
但突然讀到葉劉淑儀專欄，提起天馬苑此店，故有感而發。葉劉姐姐分析的角度與我不同，但問題如一：「天馬苑住的是基層市民，這食肆散枱要求消費是四百元至八百元一位？邊類客會去幫襯呢？」