张继聪爆Anson Lo嗲功劲白只冇力反抗 赞Edan聪明仔开心被问到口哑哑丨独家

张继聪、白只相隔7年再合演贺岁片《盗月者》，两人认为全靠Friend底，演戏更有默契，更大爆Friend足27年的原因。这对好兄弟讲到停唔到，包括跟MIRROR 3子合作的趣事，如被Edan问到口哑哑；白只被Anson Lo狂嗲；又大赞他们工作态度好又够主动，姜涛就努力挑战反派角色。采访：杜杜 摄影：朱伟彦 发型:Sam Cheung(阿聪)、化妆:LevinaBoMakeUp(阿聪)

阿聪和白只由17岁开始成为好兄弟，从未试过闹交反面。

阿聪心目中白只演技永远都一样出色。

白只欣赏阿聪为人唔自私，好乐于分享。

阿聪和白只在戏中同样是好兄弟，分别演“大贼”及“渠王”，齐去日本偷表。两人均承认私下感情好，对拍摄有一定帮助，阿聪说：“今次个戏都好讲默契，尤其我角色唔系好讲嘢，观众要睇几场戏就睇到我哋嘅过去。”

阿聪演的“大贼”性格冷静，负责统筹日本偷表计划。

白只饰演爆破专家“渠王”，性格火爆。

濑嘢互相扶持27年

两人由读演艺开始friend足多年，阿聪称大家品味好接近，互相影响，当年他毕业后以歌手起步，好长时间冇演戏，全靠白只供应演戏的养份，“佢讲讲埋埋我就袋住，到我入行7、8年，开始喺TVB拍戏，试吓佢讲嘅嘢，真系啱㖞！”白只认为阿聪无私分享，亦成为维系兄弟情关键，“冇乜私心，好多嘢都肯主动分享。我哋啲重要时刻，就算唔喺对方隔离，message会到，我濑咗嘢或者佢濑嘢，好需要有个人喺隔离，会知道佢喺度，简单一句就OK，遇到挫折，有人会明，好难得。”

阿聪和白只在戏中虽然是好兄弟，但亦有冲突戏份。

44岁的阿聪由17岁开始跟白只相交，“真系缘份，人生最重要阶段都喺对方隔离，做紧同一行，又好钟意同一样嘢，亦永远唔系竞争对手。”2016年阿聪跟白只分别凭《陀地驱魔人》及《踏血寻梅》提名金像奖最佳男配角，“最记得有前辈同我讲，依家就好兄弟，过多几年唔知仲做唔做到？！佢唔系心地唔好，系以前辈身份知道呢行好难，可以好衷心为对方好，佢攞奖我开心过自己攞，唔攞先至冇天理，睇佢做任何戏，同边个做对手戏，都冇输，都系劲，有自己风格又做得好，就算未如理想嘅剧本，救唔返个戏都冇输，呢个就系功力。”听完阿聪狂赞，白只出奇地冷静，仲笑言：“我自动有个机制，唔会信佢囉，把口𠺘过油，哈哈！”

阿聪谓人生重要阶段白只都在身边支持，如跟谢安琪结婚收到不少评击。

阿聪和白只上次合作已是2017年电影《今晚打丧尸》。

赞3位镜仔好态度

讲到跟3位MIRROR成员合作，两人都认为他们工作态度相当好，阿聪又鼓励Edan努力转变演法，“我同Edan讲‘你啲fans点都会钟意你’，希望认真做完，其他导演会睇到佢可以做一啲好‘实净’嘅戏。”阿聪又赞Edan好努力，“佢系不停咁问，读书人好聪明，有时问到我哋都口哑哑，佢睇剧本又俾佢揾到bug出嚟，好有sense，演嘅时候又跳出自己comfort zone，用佢以前方法演佢会舒服啲，但我哋叫佢试吓，佢又试，如果观众觉得佢有唔同，绝对系佢自己努力得返嚟。”

阿聪和白只无论戏里戏外，都带领后辈Edan和AL。

白只和阿聪都赞Edan好肯发问，令他不断进步。

至于初次合作的AL，阿聪笑言见到佢跟白只相处的情况相当惊讶，“我迟几日入组，已经见到Anson同白只揽头揽颈，去到尾直情系难舍难离。”白只否认：“佢太夸张啦！”阿聪即AL上身，即场嗲白只“Anson系会叫佢‘你快啲啦！畀我摸吓个肚腩啦’，去到咁样㖞！”白只终认，“依家啲年轻人，见到就咁笃埋（肚）嚟，哈哈！”白只眼中的Edan亦是“问题青年”，而AL就会约食饭继续倾剧本，“佢哋成功系有原因，会畀心机问，Edan系一种外向，Anson系另一种。”阿聪亦赞姜涛好畀心机演反派，“要演一个同佢反差好大角色，对佢嚟讲唔容易，佢都好想挑战呢样嘢。”

阿聪估不到AL原来唔慢热，好快跟白只变熟。

阿聪见姜涛很努力，尝试挑战反派角色。

《星岛申诉王》已推出全新项目“区区有申诉”，并增设“我要赞佢”栏目，现诚邀市民投稿赞扬身边好人好事，共建更有爱社区。立即“我要赞佢”︰ https://bit.ly/3uJ3yyF

想睇更多精彩内容，请立即浏览“区区有申诉”活动专页，https://bit.ly/41hgS9E

《星岛头条》新网站有更多精彩内容：http://www.stheadline.com/