張繼聰爆Anson Lo嗲功勁白只冇力反抗 讚Edan聰明仔開心被問到口啞啞丨獨家

張繼聰、白只相隔7年再合演賀歲片《盜月者》，兩人認為全靠Friend底，演戲更有默契，更大爆Friend足27年的原因。這對好兄弟講到停唔到，包括跟MIRROR 3子合作的趣事，如被Edan問到口啞啞；白只被Anson Lo狂嗲；又大讚他們工作態度好又夠主動，姜濤就努力挑戰反派角色。採訪：杜杜 攝影：朱偉彥 髮型:Sam Cheung(阿聰)、化妝:LevinaBoMakeUp(阿聰)

阿聰和白只由17歲開始成為好兄弟，從未試過鬧交反面。

阿聰心目中白只演技永遠都一樣出色。

白只欣賞阿聰為人唔自私，好樂於分享。

阿聰和白只在戲中同樣是好兄弟，分別演「大賊」及「渠王」，齊去日本偷錶。兩人均承認私下感情好，對拍攝有一定幫助，阿聰說：「今次個戲都好講默契，尤其我角色唔係好講嘢，觀眾要睇幾場戲就睇到我哋嘅過去。」

阿聰演的「大賊」性格冷靜，負責統籌日本偷錶計劃。

白只飾演爆破專家「渠王」，性格火爆。

瀨嘢互相扶持27年

兩人由讀演藝開始friend足多年，阿聰稱大家品味好接近，互相影響，當年他畢業後以歌手起步，好長時間冇演戲，全靠白只供應演戲的養份，「佢講講埋埋我就袋住，到我入行7、8年，開始喺TVB拍戲，試吓佢講嘅嘢，真係啱喎！」白只認為阿聰無私分享，亦成為維繫兄弟情關鍵，「冇乜私心，好多嘢都肯主動分享。我哋啲重要時刻，就算唔喺對方隔離，message會到，我瀨咗嘢或者佢瀨嘢，好需要有個人喺隔離，會知道佢喺度，簡單一句就OK，遇到挫折，有人會明，好難得。」

阿聰和白只在戲中雖然是好兄弟，但亦有衝突戲份。

44歲的阿聰由17歲開始跟白只相交，「真係緣份，人生最重要階段都喺對方隔離，做緊同一行，又好鍾意同一樣嘢，亦永遠唔係競爭對手。」2016年阿聰跟白只分別憑《陀地驅魔人》及《踏血尋梅》提名金像獎最佳男配角，「最記得有前輩同我講，依家就好兄弟，過多幾年唔知仲做唔做到？！佢唔係心地唔好，係以前輩身份知道呢行好難，可以好衷心為對方好，佢攞獎我開心過自己攞，唔攞先至冇天理，睇佢做任何戲，同邊個做對手戲，都冇輸，都係勁，有自己風格又做得好，就算未如理想嘅劇本，救唔返個戲都冇輸，呢個就係功力。」聽完阿聰狂讚，白只出奇地冷靜，仲笑言：「我自動有個機制，唔會信佢囉，把口𠺘過油，哈哈！」

阿聰謂人生重要階段白只都在身邊支持，如跟謝安琪結婚收到不少評擊。

阿聰和白只上次合作已是2017年電影《今晚打喪屍》。

讚3位鏡仔好態度

講到跟3位MIRROR成員合作，兩人都認為他們工作態度相當好，阿聰又鼓勵Edan努力轉變演法，「我同Edan講『你啲fans點都會鍾意你』，希望認真做完，其他導演會睇到佢可以做一啲好『實淨』嘅戲。」阿聰又讚Edan好努力，「佢係不停咁問，讀書人好聰明，有時問到我哋都口啞啞，佢睇劇本又俾佢搵到bug出嚟，好有sense，演嘅時候又跳出自己comfort zone，用佢以前方法演佢會舒服啲，但我哋叫佢試吓，佢又試，如果觀眾覺得佢有唔同，絕對係佢自己努力得返嚟。」

阿聰和白只無論戲裏戲外，都帶領後輩Edan和AL。

白只和阿聰都讚Edan好肯發問，令他不斷進步。

至於初次合作的AL，阿聰笑言見到佢跟白只相處的情況相當驚訝，「我遲幾日入組，已經見到Anson同白只攬頭攬頸，去到尾直情係難捨難離。」白只否認：「佢太誇張啦！」阿聰即AL上身，即場嗲白只「Anson係會叫佢『你快啲啦！畀我摸吓個肚腩啦』，去到咁樣喎！」白只終認，「依家啲年輕人，見到就咁篤埋（肚）嚟，哈哈！」白只眼中的Edan亦是「問題青年」，而AL就會約食飯繼續傾劇本，「佢哋成功係有原因，會畀心機問，Edan係一種外向，Anson係另一種。」阿聰亦讚姜濤好畀心機演反派，「要演一個同佢反差好大角色，對佢嚟講唔容易，佢都好想挑戰呢樣嘢。」

阿聰估不到AL原來唔慢熱，好快跟白只變熟。

阿聰見姜濤很努力，嘗試挑戰反派角色。

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》新網站有更多精彩內容：http://www.stheadline.com/