【曾智華專欄】《金像獎》出閘大脫腳

第四十二屆《香港電影金像獎》上周公布提名，一睇入圍名單，我打個突。為免自己偏見，立即用WhatsApp問幾位老行尊點睇。原因？發覺不少入選的，一係唔合理，一係擺錯位。
　　
結果各人回覆大致與小弟感覺相同，也有個別「表示憤怒」的，聲明：「今屆棄權！我有我的專業標準，決定唔投票！」
　　
總之隱隱聞到少少火藥味，有點道不同不相為謀感覺，究竟發生乜事？
　　
本欄讀者皆知我是影癡，每周睇三套新上畫電影，故此大部分入圍電影皆睇過，早早內心有個評分表，邊套及邊個應該入選甚至得獎。
　　
豈料一睇公布，不期然要問：「喂喂，呢套候選最佳電影？呢個候選最佳男主角？呢套有機會贏最佳編劇？咁嘅質素候選最佳電影？唔係啩，今年班評審委員眼光奇怪啲噃！」
　　
我當然不想爆出邊套或邊個入選完全不合理啦，因要有少少保留，怕自己有「偏見」。
　　
睇名單，隱隱覺得其中有個考慮——要保證收視率，故雖個別人物唔夠班或表演未達組別水平，照提名。
　　
多項提名中，最令大家服的為最佳女配角名單，個個起碼有水準演出。
　　
另一為新進導演獎，全部令人眼前一亮，講真，佢哋平均表現，比個別提名最佳導演者，更具水平及實力！
　　
整張名單中，最令人一睇彈起的，為影帝吳慷仁，竟只被提名最佳男配角。
　　
喂！各位評審，你哋有冇搞錯？《但願人長久》中，明明吳慷仁是獨一無二男主角，如今你班友「監生」將佢大腳全中，兜咗去變候選男配角，究竟有乜盤算？係咪驚佢贏出而得罪其他「有勢力人士」？呢個決定好難服眾，也令今屆金像獎出閘大脫腳！