【曾智華專欄】「賀年盃」反高潮

龍年第一次見面，恭祝大家龍馬精神，身體健康，長年得享馬照跑的大樂趣！
　　
舊曆年尾最令香港人冇癮的，為「美斯收天價齋睇波」事件。呢單嘢背後當然有不少「議程」，幕前幕後按計劃演出矣。
　　
無奈，搞盛事，香港要靠人，即「寄人籬下」，若冇做好預防，分分鐘衰嘢要監生吞。這次當買個教訓啦，唔係人人都會按國際禮貌畀面你㗎。
　　
其實香港本土每年已有好多國際盛事，若再谷一谷，就能去到更高層次，例如本身已相當成功的香港國際賽馬日。
　　
對馬會，政府一直只緊張收幾多博彩稅，以及有需要繞過立法會搵錢時（例如起西九博物館），就去撳馬會，其他時間則有點冷漠。
　　
可能政府高層冇乜馬迷，更冇乜邊個知道賽馬事業能為香港帶來幾多潛藏利益。
　　
澳門、新加坡賽馬相繼宣布冚旗，因搞得差，在國際馬壇完全不成氣候。
　　
但香港唔同，已經有馬匹衝出香港，掃下國際極高榮譽，例如「浪漫勇士」。之後政府有冇做嘢？冇！相比運動員攞獎牌的大鑼大鼓慶祝，完全兩種心態。
　　
Hello Hong Kong唔識「賣」香港賽馬，真冇眼光！
　　
講返今日賽事，「賀年盃」非常反高潮，跑一班，只得六匹馬報名，嘥氣！
　　
基於跑第六都有獎金，即今場搞笑到包尾輸ML（多個馬位）、爬返終點的都有錢分。既然咁，點解報名仍如此冷落？若大家唔想「賀年」，不如明年取消咗佢嘞！
　　
拆局！呢場伍廄出三隻，可以全盤「操控」賽果。若三隻唔去，或決定邊隻只跑第四，如此就二三四重彩畀佢決定晒，何其荒謬？牌面好奇，最低分的「綠族無限」似冇得輸，咁二重彩複式一拖五，博爆冷腳啦！