【曾智華專欄】守得雲開見「七福」明

潮流興北上「搵食」。一到周末，湧上深圳的，簡直人山人海，一切事出有因。
　　
但同時間，倒轉亦不少，尤其想試高質素名店菜式的，有些也會專誠南下。
　　
今日想講一間守得雲開的名店「家全七福」。點解話「守得雲開」？因其尖沙咀分店，2017年計劃開業前，重本投資二千多萬元，老闆徐維均其時滿滿雄心，諗住會一擊必中，一定掂！
　　
大家可以將時光倒流回當年，樓市旺爆，股市屢創新高，直衝三萬二千點，個個沐浴在Easy Money中，大花特花。
　　
七哥（徐大師行內綽號）見市道如此，當然重錘出擊，因「家全七福」走高檔路線，灣仔總店日日爆，慕名而來者駱驛不絕，應接不暇。於是，決定覓鋪在九龍開店，分流如潮湧的豪客。七哥睇中尖沙咀中間道停車場改建的H Centre，後面有SOGO百貨，左邊有半島酒店，內地客不停在附近穿梭。更甚有座全新醫療中心就在隔鄰，內有百計名醫，一切一切，皆有利經營高級粵菜，當然信心滿滿，認為冇得輸！
　　
豈料時也命也，到真正開業時，不久即遇上2019年大型社會運動，繼而就是長達兩年多的疫情，香港謝晒，又因封關，內地豪客絕跡，一切變冰封。
　　
屋漏更兼逢夜雨，附近的海員俱樂部改建時，發生沖天大火，後面的SOGO也捱唔住停業，真係要幾黑有幾黑。
　　
幸而七哥乃香港粵菜泰斗，熟客極多，加上底厚，疫情過後，灣仔總店很快回復昔日晚晚爆場面。繼而是尖沙咀分店，因守得住，也捱過去了。前晚小弟友人有喜事，豪一次去歎隻七福的「香港第一乳豬」。踏入，九成滿，經理Carson開開心心話：「碌Sir，今次守得雲開，卜到滿喇！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。