【曾智華專欄】真真假假，假假真真

上周日全香港馬迷、球迷經歷咗真真假假、假假真真的一日。
　　
當日下午開心死，因有雙料娛樂。一方面欣賞近月鬥志鮮明、士氣如虹的香港隊，出戰國際邁亞密。當中最令人振奮為落後一球後，眾將仍死拼，終半場打和，四萬球迷歡聲響徹雲霄。
　　
另一方面，香港經典一哩賽也同時舉行，準馬王「驕陽明駒」瀟灑表演。
　　
點解假假真真、真真假假呢？
　　
首先講波。邁阿密真的來了，也真的入了幾球。假的？當然是美斯及蘇亞雷斯稱有「炎」，一分鐘都唔落場。你係球迷，唔鬧爆就奇。
　　
其實美斯由落機一刻，已擺出個又攰又殘又厭惡款，根本唔想嚟香港。點解？只有佢自己知。但邁亞密衰到連一分鐘都唔放美斯出場交代一下，只稱有「炎」唔踢得，令我輩球迷真想兜腳伸班主碧咸落大西洋，因今鋪擺明「呃錢」！
　　
講返馬。「驕陽明駒」當然真跑，根本其他對手冇得跑，睇嚟今季做馬王也絕不出奇。
　　
呢場奇在潘頓好似真係想撼一撼，故十年唔逢一潤，搞到要罰停賽。以佢同競賽小組的長年「信任互動」，罰停賽？罕見到唔多似真！
　　
最過癮，跑第三的是全場最低分的「久久為尊」（唔爆一爆，三、四重彩邊有咁好分？），只得六十四分，跑「贏」比佢更高分的六隻馬，究竟評磅員的評分有幾「真」呢？又或出戰的馬跑得有幾「真」，竟才可輸畀最低分馬？
　　
今晚快活谷賽事，最有興趣研究最長途二二○○米一場。牌面馬而又有往績的，包括「奇妙年華」、「慶萬家」及「國大合」，決定全部飛起。要另外三隻，「夢照發」、「同寶寶」及「一支箭」，全部未跑過同程，但相信頭馬必在其中，買Q及PQ啦！