【曾智華專欄】輕微案件，政府「重傷」

近日圍內老友茶餘飯後，都攞一宗法庭案件來搞笑。邊宗？主角正是我哋老友、前個人私隱專員黃繼兒大狀的輕微交通事故案。
　　
好嘞，而家判完可以公開講啦。
　　
點解我哋呢班「百厭老人」覺得單案咁鬼好笑呢？乃因黃大狀在香港法律界極具盛名，不少人爭相搵佢打案。事實佢經驗豐富，更做過律政處。打案即「打波」，清楚球例及相關人物特性者，勝算當然高啲啦，故佢案件接不停。
　　
以黃大狀級數，接單大案，來個開案陳詞都要過百「粒」」啦，咁嘅身價，豈會「胡亂出招」？
　　
原來錯！話說去年4月中一個晚上，老黃在沙宣道與域多利道交界迴旋處，與前面的士輕微碰撞，佢車在後，一般當然輸晒。
　　
小弟也是駕駛者，遇上冇傷人案，通常都會一人行一步，私下和解。
　　
不過，不少的士司機的做法是有錯無錯，落車即粗口大罵，啱晒咁款。我的處理方法簡單：「師傅，斯文人，唔好講粗口，想唔想報警畀阿Sir處理？」
　　
通常對方一聽報警，即窒一窒，因十之七八有不小心駕駛紀錄，若自己也有錯，又唔肯和解，分分鐘會再被告，如此，多立即收火，攞返個彩算數。
　　
黃大狀個案，的士司機正是誇大案情，獅子開大口，搞到老黃㷫爆玻璃。好！就同你玩大佢，親自上庭盤問證人，盤問完司機，再盤問交通警。結果裁判官何慧嫻裁決時，直指的士司機誇大供詞，證據顯示兩涉事車輛根本冇乜損毁，遂判黃大狀不小心駕駛罪名不成立。
　　
有趣的是，如此一單輕微交通案，因當事人為大狀，律政處也要外判大狀做主控。老友，今次納稅人冤枉喇，起碼冇咗百幾「粒」！