【曾智華專欄】機管局發債似阿伯……

上周四又到「為食敢死隊」每月聚餐，大家照例就近日香港種種現象噴口水，不亦樂乎。
　　
座中有金融專才、大狀、前高官、教授、傳媒高層、醫生⋯⋯上晒岸的財務自由人。
　　
傾到七時左右，突然個個手機彈出信息，一睇，大部分抓頭，冇晒癮咁款呻：「頂⋯⋯佢個頭鎚，有冇搞錯？今鋪真係點鹽唔鹹，點糖唔甜，得啖笑，嘥Gas，下次唔玩嘞！」
　　
班大哥講乜呢？正是上周四機管局三跑債券公布認購結果，於是銀行及財務機構第一時間通知申請客戶，派到幾多手。
　　
今次有十七萬五千份有效申請，總認購額近一百六十億元，較總發行額五十億元超購二點一倍。中籤者最少可分得兩手。但無論你掟幾多錢去申請，也一律最多只分得三手。
　　
意即你就算掟過百萬元去抽，也是中三萬！
　　
座中「金融P」最㷫，因佢正正大拿拿用一百五十萬元去抽，諗住博得幾多得幾多。
　　
其實作為「金融專才」，「金融P」真係儍儍哋。因精算師推斷，今次正常最多每人分得三至五手，八手已算「奇蹟」。所以，點「幻想」好，都只應用十萬元去抽。
　　
呢呢，小弟正是如此。不過，仍覺冇癮。搞到身水身汗，將錢調來調去，才得三萬，意即揸足全期，才有不足三千二百元利息。
　　
你話啦，中三手都係每季只有三百一十八元利息，夠乜啊？
　　
最抵死為大狀K：「呢單機管局發債，似足我哋長者去殊殊，絕不暢快，窒吓窒吓玩滴滴仔。你發債，即要錢使，點解唔發多啲？如今又唔係派福利，發債即向人借錢，人哋肯借畀你，就借多啲啦，大家好嘛。發咁少，求其搵個券商都可以包起啦，真係有啲多餘！」