【曾智華專欄】我紋身我不壞我企穩

在香港做食店，有的好難捱，有的則捱吓捱吓，憑真正實力，生意日比日好，慢慢累積熟客，最後企穩，掂！
　　
話說一年前，土瓜灣天光道及靠背壟道交界，突然開咗間燒臘小店名「有樂燒味」。點解話突然？因間舖附近全是車房，選址怪怪哋！
　　
更「怪」，此店由一人經營，是位年輕師傅，個頭紮辮，滿是紋身。老街坊經過指指點點，因玻璃窗外掛出一張立場宣示海報，非常搶眼，背景是一隻粗壯的手，也滿是紋身，上寫——紋身不會讓你變成壞人，打呔也不會讓你變成好人！那個區非常多屋邨長者，理所當然對紋身漢有點成見，故甚少幫襯。
　　
我呢，發覺呢位師傅非常有性格，專誠買咗兩次燒腩仔食，咦——得喎。於是在《頭條日報》介紹。由此，開始有傳媒邀約採訪，但呢位師傅仔對曝光似乎無大興趣，一於拒絕拒絕。
　　
不過，附近經過的學生（學校區）及年輕人，似乎對這位「前衛師傅」相當受落，紛紛幫襯，慢慢開始誇張到有條小人龍。
　　
有日冇咁忙，我搵佢傾幾句，原來此君名Kitson，音樂發燒友，經已成家立室，太忙的時候，老婆大人也會出舖幫手。
　　
上周晚七點左右，又想食燒腩仔，遂走去「有樂」，諗住斬料返家送紅酒。
　　
「唔好意思呀碌Sir，乜都賣清光喇！」
　　
我有冇失望？不但無，反之內心充滿喜悅。因見證一個刻苦年輕人，由畀老街坊指指點點唔幫襯，捱到企穩晚晚清倉，才一年時間，證明機會絕對可以雙手創。
　　
「Kitson，建議你研究入多少少高檔貨，因附近有好多中產屋苑，大量嘴尖客（究竟我算唔算呢？）願畀多點錢，買高質素燒臘，你可擴闊客路㗎！」小弟多口提議。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。