【曾智華專欄】符碌中兩場十倍Win

早前小弟在本欄挑戰嘲笑馬評人貼士唔準者，請佢三個賽日畀三隻W，中的話全港馬評人跟佢挽鞋。
　　
點解？因笑人容乜易？跑馬乃非常難測的「運動」，有千百種因素影響賽果，除先天馬匹實力（最易評估）狀態外，練馬師出擊部署與騎師演繹，也變化萬千，更何況一場馬超過十隻跑，其他馬房及騎師會通知你作戰策略嗎？更甚若你博我又博，可能畀人封、畀人撞，所以神仙才能肯定賽果。
　　
正因如此，我見啲下巴輕輕友仔以為自己好醒，肆意柴人貼士唔準，窒返佢兩句啫！
　　
講完，講返自己。周三貼七隻，聲明博博吓，每隻十蚊雞W、P。結果符符碌碌撞正半冷「皇金風速」及「常常有餘」，一隻巴度殺，一隻「田雞」食，奇在皆W派一百零九元、P派三十元，何其巧合。即投注一百四十元，派二百七十八元，近一倍利潤，希望本欄支持者執到多少！
　　
其實能中兩隻，純根據以往經驗，大賽乃「軟硬鞭」潘頓開餐日子，一日掃幾W閒閒哋，贏百幾萬元獎金，食到嘔、飽到滯啦，跟住的賽事日，仲唔玩伏匿匿「夢遊馬場」咩？第一，要比其他人搵吓食㗎嘛；第二，輸馬唔一定輸㗎，可能贏㗎，點解會咁？你自己估啦！
　　
正正有此推斷，才估計周三老潘會突然儍吓儍吓，中到應囉。
　　
好嘞，明日又有高潮，兩場級制賽！
　　
「香港經典一哩賽」跑平磅，本來應該優勝劣敗的。不過，個別幕後人策略，可能目標根本不在呢場，而是食大茶飯的「打吡」大賽。故今次不會耗盡體力，也不會將潛藏全部曝光。
　　
睇評分，「驕陽明駒」著數到嘔，咁就用佢做膽，二重彩複式拖「嫡愛心」、「喜蓮勇感」、「智取神駒」及「勁速威龍」」好了，福有「油雞」呀！