【曾智華專欄】「最佳男主角」潘頓

睇「軟硬鞭」潘頓騎馬，可以拍案叫絕，冇得唔服佢騎功，尤其攝位功，但同時也可以令你谷到中風爆血管，因佢會突然變「澳門騎師」。
　　
上周日潘頓掃六W，盡顯騎功！尤其騎兩隻排外檔的「高進明駒」及「魅力知遇」，前者十二檔，短途千二米，佢示範表演由外檔「游」入內檔的功架，簡直是教材級。另外「魅力知遇」也是早段操控步速加忍住爆炸力，先混入馬叢，入直路才拉出外檔，逐步而上，橫掃而W，拍爛手掌。
　　
當日贏的每隻馬皆不會放頭，也不會留到尾變人馬角力，全部順住入彎才逼出馬匹爆炸力，就此W完一隻又一隻。
　　
不過，老友，唔該你慢鏡重播佢點輸全港馬迷認為冇得輸、不少人瞓身的「金鑽貴人」。陣上恍似突變成「澳門騎師」，全程進退失據，冇晒其他場次中的瀟灑自如，由頭開始混在馬堆中，到入直路都似六神無主，唔識移位抽出，以發揮此馬王的超人殺著力，奇！
　　
上周日賽事，有兩項真的好冇癮，一為再有騎師墮馬。近期呢種「意外」越來越多，相信馬會必定察覺，若成趨勢，就要開獨立調查小組了，人命馬命皆關天呀！
　　
講到冇癮，當日另一大大遺憾事件，為隻意頭好到爆的「團結一心」，竟然要人道毁滅！以今時今日的香港氣氛，發生單咁嘢，怎不無語問蒼天？
　　
今晚快活谷當然馬照跑。「軟硬鞭」食飽飽後，都要讓路比其他騎師開飯嘞？我專注研究「田雞」及巴度，兩皆高手，只睇幾時郁手。
　　
以下幾匹，勝出必有錢分，入P也會不俗，包括：「常常有餘」、「劍山峰」、「論文」、「超額認購」、「皇帝英明」、「金哥兒」及「皇金風速」。一於七隻玩掟飛鏢，睇吓有冇得執！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。