【曾智華專欄】飲食業有個大藍海

簡單問題，今時今日邊個年齡層人口最多，而且會越來越多？儍嘅都識答——長者，即五十五歲以上，每年以十萬計遞增。
　　
咁長者通常有乜普遍問題，但又唔多想講的呢？女的，我唔識答；男的，當然是下面開始唔生性，力度日比日弱。
　　
即是——細時一支箭，老時一條線。因膀胱肌肉鬆弛，加上前列腺發大，小便日漸冇力也。輕則要慢慢谷，重則「滴滴仔」，鞋頭濕晒。
　　
故此，正常現象，入到男廁必定見到尿兜之下有大灘尿。你估個個唔想射準啲咩？但心有餘而力不足嘛，無法啦。
　　
好多夫婦拗頸嘈交正由此起。寧願就老婆大人的，會放下男性「樽鹽」，坐下小便，我選擇拒絕，咁點？每次小完便，自己抹返！
　　
今日講呢個話題，因發覺不少食肆決策人矇查查，面對一個大大生意藍海都唔識開發，這正是老年男食客的藍海！
　　
食肆成功，當然有多方面原因，包括裝修、氣氛、服務、出品、價錢⋯⋯但有幾多老闆能領略，若自己餐館有一個令年長男客人放心又安心「殊殊」洗手間的重要性呢？
　　
老老實實，第一，男人都要私隱，若你排尿兜無遮無掩，硬要大家排排企一齊「殊」，點都有啲心理障礙，去得唔暢快。
　　
更甚，五十幾歲開始個個前列腺發大，谷尿時間已經要長，若再旁邊有人企住，肯定會加大「窒度」，呢吓冇人會坦白相告，但大家心照！
　　
所以，若食肆有個令「老男人」小便有安寧舒服感覺的洗手間，一定大大加分（但冇人明顯話你知）。
　　
其實唔難搞，只要尿兜之間有個略高的間隔，已經非常理想。唔識？你去又一城戲院，參觀吓佢個男廁啦，設計攞足一百分㗎！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。