【曾智華專欄】他鄉遇陳志誠

陳志誠係邊位？台北時代寓所（Hotel Resonance Taipei）值班經理。有乜咁特別？特別在佢係香港人！
　　
多年來走勻全球各地，當然要入住酒店，除過去二十年在中國四、五星酒店外，絕少遇上香港人做經理的，故此，相當罕有。
　　
Check-in時，陳經理突轉方言Channel，用廣東話說：「曾先生，我細細個已聽你電台節目㗎啦！」
　　
呢句話聽咗千百次，但在台灣酒店聽，第一次，故此極有親切感，速速索取名片。
　　
台北乃旅遊勝地，新酒店不斷出現，間間我都想試。呢間乃肥女兒選擇，由希爾頓集團管理，合乎國際標準，而眼見的客人也非常國際化，包括日本、歐美、印度、內地⋯⋯
　　
衡量酒店水平，小弟有一準則——房間，尤其是床鋪枕頭有冇異味？
　　
最冇癮，回到內地，多年來無論建成幾多新五星酒店，間間標榜國際集團管理，但不少一入房，即弊，因滲出「輕輕」的茅台味及煙味，真係冇鬼晒癮。
　　
試過投訴，經理滿臉歉疚：「唔好意思，曾先生，不如換過另一間房畀你好嗎？」
　　
睇佢個樣已知好無奈，因為（酒店老闆直接對我講的） 內地不少大客熟客，習慣又酒又煙，尤其關埋房門，態度是睬你都儍，照「隊」照吸，難道搞到報警乎？
　　
茅台及煙的味，一滲入窗簾地氈床鋪，立即就神仙難救，但此乃一項「文化的現實」，點搞？
　　
遊台灣，乃我的喜好。漫步街頭，見到無數各式食肆，全部收費只是香港一半，開心！
　　
放下行李後，肚仔餓，見酒店對面間「溫州大餛飩」，坐滿本地人，肯定好料！
　　
入內，就來碗熱騰騰招牌溫州餛飩麵，樓面大嬸密密手包，另一位阿姨密密手煮。
　　
八十台幣（二十港元），好得，餛飩肉味濃，拉麵夠韌彈牙，收晒貨！