【曾智華專欄】冷血極的載歌載舞

童年時老師及長輩一定教好多基本做人道理，例如在大庭廣眾前，應適當時候做適當的事，切勿只顧自己感受！
　　
今日我想講乜？正是周三尾場賽事，轉彎入直路時發生墮馬意外，何澤堯騎的「浪漫風采」失蹄倒下，小何頭先落地，郁都唔郁。
　　
正常人當然不會再理邊隻馬點跑，只集中關心何澤堯傷勢，因咁跌法可大可小也。
　　
好嘞，馬匹終於衝過終點，由「無心睡眠」爆出二十三倍大冷，買中的當然肥過豬仔。
　　
我有冇中？中五蚊二重彩複式。但有冇歡呼？當然冇！因一心只希望鏡頭盡快影回何澤堯，睇睇佢傷勢如何。結果一個Shot都冇，反而影住大群「會心微笑團體」因旗下馬匹勝出而載歌載舞狂歡，大唱《無心睡眠》。
　　
相信正常觀眾當時反應，必與小弟一樣：「喂，人哋安危未知，基本人性，唔關心都應該收斂吓啩，如今你成棚人咁鬼興奮，非常之Anti-social啫，不得體了！」
　　
幸而最終小何四肢能動，應冇重傷，今次大步檻過，望盡快康復，陣上再展雄風！
　　
明日最矚目當然為一級賽「百周年紀念短途盃」，總獎金一千三百萬元，平磅當然冇人儍到會「玩假」。「金鑽貴人」擺下擂台，抽五檔，除非意外，邊有得唔贏？「福逸」磨利換布文，當然心存大欲，一定要預佢！「好眼光」今場入腳易，W就難，P機會！
　　
睇進度，「幸運有您」相當理想，今季主攻千二米，上次一級賽入腳，輸四分三馬位，直路上被阻過，今次「金鑽貴人」有乜閃失，分分鐘佢坐正！呢場可以四隻馬複式二重彩，又或慳啲，以「金鑽貴人」做複式膽。
　　
老友問小弟，母校團體隻「堅又威」得唔得？休息不足一個月又再博，冇五倍W唔值！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。