【曾智華專欄】「安慰劑」堆填胃

香港人個胃，尤其上年紀的，不少已變「安慰劑堆填胃」。原因？其實你知我知，乃由於人口老化，大家都衰退，但又唔想面對，於是聽吓呢個嗰個專家（有的有牌，有的扮嘢）亂點，就日日吞N種「健康產品」。呢類嘢其實大部分有如做醫療實驗的「安慰劑」，食你唔壞，但唔會醫好你，心理上感覺良好矣。
　　
互為影響下，一般人越來越信要吞「補充劑」，市場越搞越大，由於並非藥物，不受監管，各路「掠水族」你出我又出，搵明星做代言人，大賣廣告狂谷。
　　
既然賣得起價錢，連鎖藥房當然大量入貨，狂賺上架費，搞搞吓，阻地方又冇乜利潤的貨品（例如潄口水），被逼讓路。
　　
我也曾被某某「另類醫療」專家「忠告」（即係老點），話要一日食十幾種草本藥，又話排毒，又話防癌，總之乜都得。
　　
食咗半年，大佬呀，錢就使咗，完全唔覺有乜增強體質或疾病遠離之類效果，做完老襯，立即停止再食。
　　
其實排毒容乜易，多多食菜，朝朝食隻熟大蕉，再加鮮奶及大量水，立即乜毒都排清。
　　
補充營養？消委會早早指出食用「真實食物」加飲食均衡，已有足夠營養。
　　
小弟以上兩樣日日做，加上正面思維，自我減壓，立時免疫系統加強，疾病遠離。
　　
當社交場合中人交換食乜乜物物「補充劑」時，除非問我，一概冇意見，費事踢爆。第一，此乃龐大金礦，不少人靠佢搵食（由出品到廣告到傳媒到營銷⋯⋯），一條龍養好多人㗎；第二，既然食的又覺心安理得，冇不良反應，我咁多口做乜呢？
　　
正如個個七嘴八舌研究買乜「金融產品」時，難道我次次踢爆話啲嘢係搵你錢，而並非替你搵錢咩？好Anti Social啫。