【曾智華專欄】「政府隊」快示範表演

作為幾十年公務員，小弟深知任何政策，政府公開講咗而做唔到的話，官場文化之內，乃非常大鑊的瘀事。負責官員自己冇晒面外，必連累上司替你孭。如此，上司孭完後，為免下次再瀨嘢，唯有移走主責者。今次會否就發生？大家睇多幾個月啦，我估會！
　　
再講一次，垃圾分類及徵費，百分百是個應做的政策。香港社會作為國際金融中心，強調自己是先進城市，有乜理由推動環保大墮後？講出來都面紅啦。
　　
事到如今點搞？
　　
「政府隊」一定要瞓身出擊，做個示範，話畀全香港市民知：「唔係冇得搞，若我得，你唔做，就係你搵藉口唔搞！」
　　
之後再堅實推行再執法，反對聲音必弱得多。
　　
乜叫「政府隊」？即政府控制的一切範圍。首先由政府總部開始，再到各個政府部門。各個部門阿頭在自己建築物內，嚴格執行新政策。
　　
「政府隊」也包括政府可以控制的所有機構，全港資助機構、學校、社區中心、康體場地、醫管局醫院診所⋯⋯
　　
最重要是房屋署責無旁貸，必須身先士卒，將全港公共屋邨變為「環保大廈」典範。房屋署有一切資源、人手及權力去應付唔合作的居民，問題在是否由下而上，再由上而下去馬，支持呢個事在必行又屬全港大利益的環保政策。
　　
當「政府隊」全軍出擊，主動做，積極做，自然會成為全城示範。
　　
再者過程中全港公職人員（公務員及出政府糧一族），皆必須履行責任令政府成功，如此才產生巨大推動能量。
　　
早前小弟清楚指出，呢場仗必須由政務司司長陳國基親身掛帥才掂，若只由環境局單打獨鬥，肯定繼續一鑊泡！