【曾智華專欄】感性輕鬆個幾鐘

電影界的現實， 電影界的無奈——精彩電影未必賣座，很是可惜，但經常發生！
　　
例如今個檔期的新片，不用欣賞能力特別高，只要睇過，都知論水平、論質素、論電影製作的方方面面，《墮下的對證》遠遠彈離所有對手。事實此片也橫掃歐洲影展各大獎項。不過，睇睇各龍頭戲院的安排，就知票房必定慘淡，因一係根本唔放映，一係只得一場或天地場。
　　
點解？唔知，總之就是嚴重嘥料！任何影癡理應必看，尤其導演積絲汀蒂耶及女主角姍迪許娜，前者的導技及編技、後者的演技，皆令人眼前一亮，功力之高，難得一見！
　　
另一套也是精彩作品，我看的一場，只得不足十個觀眾，希望此文見報時，仍未落畫吧。正是真實個案改編的《一球翻身》。
　　
此片並非甚麼驚天大製作，只是在整整一百零四分鐘內，你一定會很享受，因內裏有人性、有感性，充滿勵志及激情。
　　
真實發生過的震撼球壇慘案！美屬薩摩亞足球隊，於2001年慘遭澳洲隊喪炒三十一比零，成為足球史上的最瘋狂羞辱性鬧劇，結果一場絕不重要的球賽竟變國際大新聞。
　　
但衰到貼地仍得繼續，因世界盃外圍賽又殺到，冇得唔踢。
　　
薩摩亞為一個小島，全部球員皆島國鄉下仔，純情天真大大隻，但球技則屎到貼地。點搞？終於搵到一個狂躁白人教練（教邊隊死邊隊），因冇班落，決定到小島一試。
　　
屎波雜牌軍加上失意黑仔教練，會擦出乜嘢火花呢？此片比《少林足球》更精彩，推薦入場！
　　
戲中有一位跨性別球員喬雅（Jamah），乃真真正正美屬薩摩亞足球員，男兒之身但嬌嗲，悅目又吸引。