【曾智華專欄】香港貓王殺返香港

前朝手機跳出移居加拿大多年的哥哥Peter短信，附一張海報圖片，寫道：「阿碌，你快啲通知香港班長者飛仔樂迷，大喜訊！上世紀六十年代香港貓王岑南羚Lanny Shum，將於3月中殺返嚟，做一場演唱會！應該只此一次㗎喇！」
　　
年輕人當然唔知岑南羚係「乜水」（以前某某夫人的口頭禪），但上世紀五十、六十年代的飛仔飛女（即潮人），唔識Lanny，肯定你只是扮潮！
　　
老岑五十年代至六十年代，乃香港最有型、最前衛、最西化的傑出表演者，在公開歌唱比賽奪得冠軍而爆出後，以擅長唱貓王皮禮士利經典歌而橫行香港樂壇，另外，鼓技也奇勁，所以，橫空彈出成為年輕人偶像。
　　
大半世紀前能講流利英語的香港人甚少，能咬正英文發音唱歌的更少。Lanny單單唱貓王的歌，巴閉到1970年以首位華人歌手身份，被賭城拉斯維加斯凱撒皇宮重金禮聘演出，真的是無上榮耀。
　　
五十年代，佢開始活躍於音樂及電台兩界，曾擔任麗的呼聲兒童節目編劇及演員，從此與廣播界結下不解緣，長期遊走於N間電台電視台台前幕後。
　　
此君精力無限，七十年代移民多倫多，身處外地，同樣是風頭躉，橫掃電視、電台、舞台及出版界。冇得唔服，今年七十八歲，仍唱得跳得！
　　
大家想睇佢演出，YouTube有不少，但當然欠缺出道時，尤其在拉斯維加斯的片段，因實在是「遠古距離」。
　　
2021年，有感於Lanny演藝方面的重要貢獻，多倫多政商及演藝界空群而出，隆重舉行「岑南羚傳媒演藝68年成就頒獎典禮」。
　　
人，總有威威後回鄉的願望，成真喇！3月16日岑南羚會在九展開只此一場的演唱會！想睇？請聯絡Angel Kot，電話9239 9663。