【曾智華專欄】跑假馬，踢假波

中央電視台播出系列反腐紀錄片，收視熱爆，引起全國人談論。
　　
影片中中國足協前主席陳戌源及國家足球隊前主帥李鐵，將貪污行賄過程一五一十道出，並表示懺悔（當然跟足劇本）。
　　
中國足球一直衰到貼地，係人都知不少球賽都是台戲，「球員就是演員」。大家早已見怪不怪這爛透局中，人人打假波是正常、行賄買權位是正常，貪污也是正常的時候，突然中央閃電嚟真掃場，陸續全部扮蟹。
　　
我一邊睇，一邊有個疑問，為乜等到如今才郁手？難道十年前冇人知嗎？話說回來，個架構原來可以爛成咁，也有點「出人意表」。
　　
其實資深馬迷也好，落注的「球迷」也好，哪個會不知波及馬並非場場踢真及跑真？不過，全世界頂級球賽及賽馬也如是——真唔晒，也假唔晒。遊戲設計就是「需要真時盡真，其他時間可假」，因涉及台前幕後龐大利益交收也。
　　
例如賽馬，跑國際一級賽時，誰會蠢到造假？嫌錢腥乎？獎金天文數字之前，當然博老命打真軍。
　　
足球呢？入到歐聯決賽周，你仲打假？想老闆及教練殺咗你？大家皆行家，一落場就知打真定打假！
　　
事實，全球足協由國際足協到歐洲足協，也充斥真真假假，大家若睇過Netflix紀錄片，踢爆組織中行事的荒謬，應領略一二。
　　
不過，人哋就識跑吓真、踢吓假。國足呢？由上至下都玩假，搞搞吓咪唔識踢波囉。
　　
今晚快活谷賽事，當然又係跑吓真、跑吓假，馬迷投注樂趣，正是捉你真定假！
　　
第四場一千米，「萬眾開心」乃當然的膽，可複式二重彩再加Q，拖「人和家興」、「英雄豪邁」及「浪茄仔」。呢場潘頓應該唔夠膽玩「軟鞭」啩？