【曾智華專欄】《潛行》值得入場嗎？

劉德華作品一套接一套上映，有點自己打自己，但冇乜問題，反正兩套都非主要「睇佢」。
　　
《金手指》小弟認為劉德華繼續扮演「劉德華」，冇乜驚喜，演技深度也不見。《潛行》又如何？今次身兼監製及主角，擔子更重。成績？還是讓大家入場觀看再評論。
　　
又係嘞，花一百幾十元睇兩個影帝（劉德華及林家棟）、一個影后（劉雅瑟）、一個超級靚仔（彭於晏）及一個超級動作設計專家（錢嘉樂），炒埋一碟美味菜式，雖然不算頂級，但從任何角度都收貨啦。
　　
此片導演為關智耀，身兼攝影師，兩個角色，明顯攝影方面的功力高得多！
　　
難明劉德華要做監製，又決定選做片中的角色。論戲，佢有多場要與林家棟單對單鬥演技，真係弊，明顯差咗一班波，搵自己形象嚟搞！
　　
另外，劉德華一向以「永恆靚仔」形象出現，今次又弊，碰上一個如日方中的型仔美男彭於晏，不怕不識貨，最怕貨比貨。在連場動作戲及大特寫樣貌時，又係嘞，點睇都蝕晒章喎老友。
　　
可能華仔自己對自己的演技及「保鮮」大法，有過人的百分百信心啦。
　　
《潛行》整體成績一般，但有幾瓣特別值得欣賞。第一是錢嘉樂的動作設計，無論飛車、爆破及槍戰，皆頂級荷里活水平。若有足夠預算畀佢任玩的話，效果肯定更加不得了。
　　
另外，林家棟再一次示範影帝級演技，扮乜似乜，絕無刻意，不留痕跡，睇佢狀態，幕前肯定有排去，成就必能再創高峰。
　　
少少遺憾是影后劉雅瑟，全片只是行行企企，毫無發揮機會，浪費大好演技，真的無奈。
　　
總結，《潛行》值得入場，但也有太多欠理想之處，未到A級水平，B級啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。