【曾智華專欄】畀偉仔佢都唔敢攞

任何圈子，涉及表演的，必有兩個公認水平。第一個是「看台公認」，即不用專業判斷，一般觀眾睇一睇，已知你有冇料到。
　　
第二個高一點層次，是「行家公認」。即你過咗公眾一關，已去到專業層次，但仍會有高低之分，正是行家一出手，便知有沒有！
　　
歷屆的奧斯卡、金球獎及香港電影金像獎，絕少（幾乎冇）有機會爆大冷，因全由行內專業團體評分。一個評判可能有私心亂嚟，但由眾多電影工作者工會選，結果好難離晒大譜。若真的出現不受公眾及行家認同的賽果，得獎者都面懵懵唔好意思上台啦。
　　
小弟想講乜？正是上周六本報娛樂版頭條大字標題——《梁朝偉吳慷仁亞洲電影大獎爭帝》，睇此標題時，剛剛一啖奶茶入口，幾乎噴返出嚟。點解？因為「爭帝」兩字套咗黃色，煞有介事，好似真係半斤八両有得爭咁款。
　　
各位若睇過《金手指》及《富都青年》，相信必定同意，兩套片內的男主角的表現水平，嘩嘩，差好遠啫。
　　
係呀，梁朝偉是公認影帝，但在《金手指》內演技如何，相信由普羅大眾到佢自己都心裏有數。喂，點可以用呢套電影提名爭影帝呀？
　　
而佢對手吳慷仁，金馬獎前從未攞過影帝銜，但在《富都青年》內的極高境界演技，不但放在香港、台灣，甚至衝出亞洲去到奧斯卡級數，都冇得輸！我有冇過譽？你睇過就明白！
　　
人頭博芋頭，3月10日當《第十七屆亞洲電影大獎》揭曉日，你就知，根本冇可能唔係吳慷仁坐上影帝位。
　　
誇張啲講，若我係梁朝偉，必會日日求神拜佛咪爆大冷中獎，因肯定被噓爆，到時點敢上台接受影帝榮銜？未面懵過乎？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。