獨家丨黃婧靈唔介意36E最強胸器成話題 黃金10年唔拍拖衝事業
黃婧靈（波波）在剛播畢的《妳不是她》，首次挑戰「戀愛腦」角色「Yuki」，她直言以往都是戀情大過天，所以好易投入角色。不過25歲的她認為未來是人生的黃金10年，想在事業上拼搏，不急於拍拖。擁36E火辣身材的波波，仲話只要公司同意，唔介意性感演出。採訪：杜杜 攝影：Stanley 髮型:HoLA@Jay場地:Silllk Aromas Beauty
波波第一次飾演佔戲較重的角色，好彩她拍過3次拖，同「Yuki」一樣都是「戀愛腦」，「我𠵱家單身，今次演出都過到拍拖癮，都會諗返以前拍拖好似『Yuki』咁，以男友為心中，戀愛大過天，所以都好明白佢嗰種心情。」不過自從拍完《後生仔傾吓偈》，她要兼顧學業同工作，想法開始改變，「知道原來愛情唔係世界嘅全部，拍拖只係其中一部份，覺得開心幸福，但都唔可以完全依賴呢樣嘢，仲有好多嘢值得投放精神同時間。」
恨同偶像梁朝偉合作
會專注事業的波波，新一年最希望戲劇和綜藝都可以有不同嘗試，特別是演戲，「我鍾意拍愛情劇，想做啲《野蠻女友》角色，有時好爽朗，有時又好依賴另一半，演到呢種反差會幾得意，另外想做醫生好正氣，我都有睇《白色強人》嗰類醫生劇，唸一段專業名詞好得意好有型。」綜藝方面，她最想自肥拍旅遊特輯，「一直好恨去芬蘭嘅聖誕老人村，仲有去土耳其睇熱氣球，都好浪漫好正。」
出道以來，波波憑住36E好身材彈起，亦經常成為話題焦點，她對此完全不介意，問到會否學高海寧「封胸」？她笑言：「封胸定豐胸呀？！豐胸唔嫌多㗎！講笑啫！哈哈！人哋只留意身材都冇辦法，唯有盡量做好自己，令到人覺得我嘅實力較身材更值得講。」講到性感演出，波波就話只要有時間準備，著泳衣都無問題，「早啲講等我操fit啲，拍嘢都想專業啲畀到個效果。」至於拍到《色戒》的尺度，就交由公司決定，「我好鍾意梁朝偉，但都要睇公司，梁朝偉接得嘅戲一定正，反而擔心自己襯唔襯得起。」
《星島頭條》新網站有更多精彩內容：http://www.stheadline.com/
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
