【曾智華專欄】《金手指》的選角

近日N咁多人問：「碌Sir，我應否入場睇《金手指》呢？值唔值得花錢花時間呢？」
　　
小弟斬釘截鐵答：「值！此乃近日話題之作，唔睇，在社交場合會好失落。況且此片大投資、大卡士，你畀一百幾十蚊睇四位影帝加成隊金像獎幕後團隊心血，超晒值啦。不過，好唔好睇就見仁見智啦，呢套片肯定不會在金像獎中大出風頭，因除美指及個別配角外，水準實在普通！」
　　
過去一周，小弟與不同資深影迷、影圈人、影評人討論此片，一致覺得選角方面可以做得更好，這樣出來的效果必不一樣。
　
當然，人人明白投資者心態，用大明星可以先在賣埠取得好價，宣傳方面也可輕易製造龐大聲勢，因全球華人傳媒都會爭住訪問梁朝偉及劉德華。
　　
大家有眼見，中晒！過去三周，《金手指》的一切，浸滿各大媒介。
　　
不過，宣傳還宣傳，電影還電影，幾乎一致的意見，覺得若由其他演員扮演「陳松青」及廉署幹探，會更神似、更有看頭，演繹的深度及闊度，會更具欣賞價值。
　　
若我可以不考慮賣座，只講效果去選角，會有以下決定：一、由老了十年的白只扮「陳松青」，呢位年輕演員可以邪氣逼人，蠱惑眼神也入晒骨；二、由太保扮廉署神探。我認識的當年廉記幹探雖具正氣，但辦事手段絕對可以正邪不分，為求破案，可以用到你意想不到的方式。無他，行賄貪污不似其他罪案，特別難查及得到相關人士合作，太保就有那種可正派、可陰森的氣場，絕少演員同時具備！
　　
還有，《金手指》中阿Sa（蔡卓妍）角色也絕不合佢演，大家睇住佢大，乖乖女形象深入民心，欠缺懾人的巴辣及霸道，搵劉嘉玲啦！