【曾智華專欄】歎完及第粥後見「狀元」

上周日賽事，小弟畀的貼士一登出，已被N咁多老友或WhatsApp或社交平台留言窒到飛起，兼盤盤冷水照頭淋，尤其「牙刷蘇」，更在入閘前來電：「肥碌，你比『聚才』，二十二倍，『狀元及第』就更離譜，二十五倍，根本冇人落飛，真係跑出我就跟你挽鞋！」
　　
嘩，佢老哥使唔使咁上心呀？小弟只下巴輕輕貼兩隻馬WP對碰，十蚊注，輸晒都係四十大元，咪話唔肉痛，蚊咬感覺都冇啦！
　　
呢類讓磅級制賽，本欄已多次分析，十之七八至八九爆冷。因高分馬唔會在呢類場合博，而唔博，得佢自己幕後知道，分分鐘贏大錢也。今季咁多場同類賽事，老友，有冇熱門W過呀？強如「加州星球」都伏匿匿啦。
　　
所以，三級賽「洋紫荊短途錦標」當然如是，問題爆邊隻。而要爆就必須杰撻撻，只有如此，一齊做戲的「演員」才有肉食！
　　
一千米直路，好蝦人及馬跑，因步速怪雞，故應首選同程有往績勝出紀錄的。呢場有「維港智能」及「賢者無敵」孭晒飛。我逐隻研究，咦！「狀元及第」今季已出三場一千米直路，一Q兩第四，非常準，只要有決心郁手，必可入圍，故才膽粗粗，連二十五倍也照貼。結果竟然贏到冇得跑，以一個馬位彈離一千米王者「賢者無敵」！
　　
好啦，今晚又有一場讓磅三級賽「一月盃」，當然又係爆的格局。睇睇報名，羅廄三隻，東廄又三隻，冠軍必在其中！
　　
羅廄出馬房王牌一百一十三分的「發財先鋒」，要孭一百三十四磅，擺明畀路自己馬房輕磅馬去殺！邊隻？推斷是「越駿歡欣」！此馬仍在上升軌，配級制讓磅賽殺手巴度，似嘞。
　　
大家可翻閱資料，各馬房出擊高班冷馬，皆用巴度，因佢騎技高而不常贏，騎乜都分多幾蚊也！