【曾智華專欄】港鐵快停「左行右企」

昨日講到任何公共政策必須因時制宜，應隨大形勢而修改，甚至取消。
　　
最鮮明例子，今天全港市民肯定不會贊成（除咗商業利益掛鈎者）個乜乜「明日大嶼」計劃，如此，就應立即學前特首董建華嗰招——我唔玩八萬五嘞，一二三正式宣布放棄大嶼山填海，將供求關係扶回正軌，令地價不再急瀉！
　　
另一個公共政策，也應是時候放棄，以免出現悲劇！這正是港鐵推行多年的「左行右企」政策。
　　
這政策原意是將扶手電梯分兩邊，唔趕的在右邊企定定，讓出左邊通道，畀趕時間的快步上或落。
　　
咪畀我講中，若港鐵再堅持執行落去，好快會出事！
　　
小弟經常搭港鐵，不時目睹危險情況。假若人流稀疏，大家悠悠閒，當然冇問題。不過，一旦遇上繁忙時間，個別人士超心急，一係衝上，一係衝落，尤其衝落的，險象環生！見過鹵莽者，竟推開前面行得慢乘客，咁搞法，分分鐘前面嗰個先仆低，再人疊人齊齊冧。
　　
其實你衝落一條電梯，快得幾多？十秒？二十秒？衝到落去，一定會剛剛有車埋站畀你上？
　　
我看，是若港鐵取消左行右企，人群流動的效率會更快，因更易疏通人群。
　　
一部扶手電梯，假若右邊企滿五十人而左邊騰空，最多同時畀十幾人快速通過。
　　
相反， 廢除左行右企，如此，一條電梯即可企一百人，究竟邊種政策更有利乘客？更快疏散人群？
　　
今日公開要求，港鐵高層若唔想自己孭上扑槌決定，咁就做個乘客調查，群眾智慧自然會度出應該點做。
　　
再講一次，如今乘搭港鐵的，乜人都有，未必個個斯文守禮，若不幸推跌一個人而重傷，就大鑊㗎啦！