【曾智華專欄】「堅又威」需唞長一點

N年前牙擦練馬師簡炳墀有句名言：「馬係要嚟跑嘅！跑得就跑！」
　　
事實佢經常安排旗下馬不停跑，跑跑吓突然會W一次。點解？留畀大家想像。
　　
小弟哎吔做過吓馬主，當然知道馬主心態，最好旗下馬不停出賽，次次落沙圈過吓癮。若隻馬好日都唔出賽的話，又冇得玩，又冇得威，個個月齋比幾萬元養馬費，好冇癮啫。
　　
不過做完馬主之後，就了解馬不同人，千幾磅重壓落四隻瘦瘦的腳，再嘭嘭聲跑，其實好惡頂。故此，一定要錫住，由獸醫及練馬師睇緊，按健康情況容許才出賽。
　　
一般馬博完一場激烈叮噹馬頭賽事，必須畀佢休息耐一點，好等體力復原，才再上陣。這個「唞」可以是三幾個月。
　　
今日想講聖若瑟同學仔隻「堅又威」，擺明好馬，但去年11月底一場千四米二班賽事中，與五歲馬「飛鷹翱翔」鬥到甩髀才分勝負，擺明消耗太多精力，不宜短期再出。
　　
果然後者不足一個月匆匆跑兩次，第二仗結果輸足三個馬位，走晒樣，用得太盡，有機會重挫其鬥心。
　　
「堅又威」又如何？雖則休息個多月，但中間曾缺課，十檔熱到得兩倍，我當然唔買，但也佩服「踴躍捐輸」人士。結果，慘，走晒樣，輸兩個多馬位，第六名過終點。是否對上一場直路鍊得太盡傷元氣？可能係，總之今次畀佢唞耐一點較好，四歲馬可以有排玩㗎！
　　
明天最有趣為三級賽跑一千米，三隻最勁的皆為騎師私家馬，一為潘頓的「四季醒」，另一為布文的「英雄豪傑」，還有兩人曾W的「賢者無敵」。如今兩大師傅三隻都唔騎，咁我就要研究邊隻黃袍加身嘞！
　　
少少哋買「聚才」及「狀元及第」WP對碰啦！